«Qazaq gazetteri» JShS-ne qarasty basylymdar redaksııasynda «Seıdahmet Berdiqulov murasy jáne qazirgi jýrnalıstıka» taqyrybynda dóńgelek ústel ótti. Jazýshy, jýrnalıst Seıdahmet Berdiqulovtyń 90 jyldyq mereıtoıyna arnalǵan basqosýǵa qalamgerdiń kózin kórip, tálimin alǵan, birge qyzmet etken Saýytbek Abdrahmanov, Ýálıhan Qalıjanuly, Jarylqap Beısenbaıuly, Janbolat Aýpbaev, Qýanysh Jıenbaı, Qydyrbek Rysbekuly, Baýyrjan Omaruly syndy belgili qalamgerler, sondaı-aq Eýrazııa ulttyq ýnıversıtetiniń jýrnalıstıka jáne saıasattaný fakýltetiniń stýdentteri qatysty, dep jazady Egemen.kz.
Jıynda «Qazaq gazetteri» JShS Bas dırektory Dıhan Qamzabekuly qazirgi «Ulan», «Jas Alash», «Egemen Qazaqstan» syndy respýblıkalyq basylymdardy basqarǵan qalamger Ýálıhan Qalıjanulyn 75 jas mereıtoıymen quttyqtap, qazaqy saltpen ıyǵyna shapan japty.
Odan keıin S.Berdiqulovtyń azamattyq bolmysy, qyzmet joly, ózinen keıingilerge kórsetken janashyrlyǵy, qalyptastyrǵan mektebi, sport jýrnalıstıkasyna qosqan úlesi týraly sóz qozǵalyp, jyly estelikter aıtyldy.
Belgili memleket jáne qoǵam qaıratkeri Saýytbek Abdrahmanov: «Seıdahmet Berdiqulov búkil qazaq jýrnalısterine standart jasap berdi. Ol jahandaný jýrnalıstıkanyń basynda tur. Ásirese qazaq jastarynyń boıyna namysshyldyqty sińirý jolynda erekshe eńbek etti. Fýtbol fenomenin qazaqqa alǵash túsindirip bergen de - Seıdahmet Berdiqulov. Búkil sport álemi onyń namysshyldyǵyn erekshe baǵalaıdy», dedi.
Sonymen qatar, is-shara qatysýshylary «Qazirgi jýrnalıstıka - tek jazý nemese tek ózińniń maqalańdy daıyndap berý bolyp ketkendeı. Biraq, eń mańyzdy nárse - uıymdastyrý isi», dep Seıdahmet Berdiqulovtyń uıymdastyrýshylyq qabiletteri týraly áńgimeledi.
Ýálıhan Qalıjanuly da qalamgerdiń qazaq jýrnalıstıkasyna sińirgen eńbegi ólsheýsiz ekenin qostady.
- «Lenınshil jas» – ultty dáriptegen, ulttyń sózin sóılegen gazet. Al Seıdahmet Berdiqulov - qazaq jýrnalıstıkasy tarıhynda altyn árippen jazylǵan tulǵa. Ol sport taqyrybynyń bastaýynda tur. Seıdahmet Berdiqulovtyń rýhy, shákirtteri, eli, jeri qaldy, ol artyna óshpes iz qaldyrdy, - dedi Ýálıhan Qalıjanuly.
Al «Ana tili» gazetiniń alǵashqy bas redaktory, belgili qalamger Jarylqap Beısenbaıuly S.Berdiqulovtyń jýrnalıstıkadaǵy erekshe qoltańbasy jaıly áńgime qozǵady.
«Seıdahmet Berdiqulov - sport tilin eń joǵary kórkem ádebıet tiline aınaldyrǵan jýrnalıst. Sport jýrnalıstıkasynyń stıli - Seıdahmet Berdiqulovtyń stıli», dedi ol.
Seıdahmet Berdiqulov - sanaly ǵumyrynda eline eńbek etken, jýrnalıstıka salasyna janyn bergen, sport jýrnalıstıkasyn qalyptastyrǵan, basshylyq qyzmetterdi atqara otyryp, izbasarlaryn daıyndap, shákirt tárbıelegen erekshe tulǵa. Ásirese onyń shákirtterge degen qamqorlyǵy, janashyrlyǵy kópke úlgi bolyp otyr. Seıdahmet Berdiqulovtan tálim alǵan jýrnalıster onyń bolmysynyń daralyǵyn únemi eske alyp otyrady.
Dóńgelek ústel barysynda pýblısıst Janbolat Aýpbaev S.Berdiqulovtyń basshylyq qyry men ustazdyq bolmysyna toqtalyp, alǵan tájirbıesi men kórgen tárbıesi týraly aıtyp berdi.
«Seıdahmet aǵa - maǵan úlken múmkindik bergen tulǵa. Ol jumys istetkize biletin. Ári qolǵa túse bermeıtin adamdardy alyp kelip, kezdesý ótkizetin. Keıinnen ony uıymdastyrýdy bizge júktedi, bizge úıretti», dedi ol.
Jazýshy Qýanysh Jıenbaev ta Seıdahmet Berdiqulovtyń qaramaǵynda jumys istegen shaqtardy erekshe yqylaspen eske aldy.
Jýrnalıst Qydyrbek Rysbekuly: «Seıdaǵań - meniń ǵana emes, myńdaǵan adamnyń ustazy, mıllıondaǵan oqyrmannyń jadynda qalǵan qalamger. Seıdaǵań - bizdiń júregimizde saqtalǵan, saǵynatyn, ustaz tutatyn aıaýly aǵamyz», dedi.
Ǵalym Baýyrjan Omaruly Seıdahmet Berdiqulovtyń qataldyǵymen qosa qamqorlyǵyn, basqarý tásilderin aıta kele, onyń jýrnalıstıka salasyndaǵy dara stılıstıkasy men sheber taqyryp qoıa bilý qabiletin atap ótti.
«Seıdahmet aǵa 61 jasynda abyz boldy. Bul bizge úlken ólshem. Ol - ustazdardyń ustazy. Mektep qalyptastyrdy. Qorǵan boldy. Onyń qorǵan bolý tásili bólek edi. Basqarý tásili, menedjment tásili de myqty boldy», dedi Baýyrjan Omaruly.
Basqosý sońynda «Qazaq gazetteri» JShS Bas dırektory Dıhan Qamzabekuly Seıdahmet Berdiqulovtyń 90 jyldyǵyna arnalǵan dóńgelek ústelge qatysqan azamattarǵa alǵys bildirdi.