Dohada daralana almaı jatyrmyz

Atalǵan jarysta basty úmit 60 kg salmaq dárejesinde kúsh synasqan Eldos Smetovke artylǵan edi. Olımpıadanyń eki dúrkin júldegeri, álem men Azııa chempıony, álem chempıonatynyń eki dúrkin qola júldegeri, Azııa oıyndarynyń jeńimpazy degen dardaı ataǵy bar qazaqtyń ataqty dzıýdoshysy tusaýkeser beldesýinde jeńiske jetip, ke­lesi kezeńde Dılshodbek Ba­ta­rovpen beldesti. 25 jas­taǵy О́zbekstannyń ókili osy kúnge deıin aýyz toltyryp aıtar­lyq­taı tabystarǵa qol jet­kize almaǵan edi. Soǵan qa­ra­mas­tan áı­gili qarsylasymen esh qaı­myqpaı aı­qasqan Batarov sheshýshi tusta Smetovti san soq­tyryp ketti.

Eldosqa qaraǵanda Nurqanat Serikbaev táýir óner kórsetti. Al­ǵashynda moldovalyq Alek­sandrý Tırsındi tize búktirgen ol ile-shala Olımpıadanyń kú­mis júldegeri, álemdik reı­tıng­tiń kóshbasshysy, taıpeı­lik Iаn Iýnveıdi jolynan yǵys­tyrdy. Bul nátıje sen­sasııaǵa balandy. Odan keıin Nur­qa­nattyń joly Tokıo Olım­pıa­dasynyń jeńimpazy, Rıo Olımpıadasynyń kúmis júl­degeri, álemniń tórt dúrkin chempıony, japonııalyq Naohısa Takatomen qıysty. Japonııanyń juldyzyna jerlesimizdiń áli jetpedi. Jubanysh belde­sýde grýzııalyq Georgıı Sarda­la­shvı­lıden utylǵan Serikbaev je­tinshi oryndy qanaǵat tutty.

66 kg salmaqtaǵy Oń­tús­tik Koreıanyń oǵylany, Olım­pıadanyń eki dúrkin júl­de­geri, álem chempıony, Azııa oı­yndarynyń jeńimpazy An Baýl elimizdiń taǵy bir beldi ba­lýany Ǵusman Qyrǵyzbaevty úshinshi aınalymda toqtatty. 73 kg salmaq dárejesinde baq synaǵan Jansaı Smaǵulov al­ǵashqy beldesýinde jeńilse, Danııar Shamshaev ekinshi kezeńde álem chempıonatynyń kúmis júldegeri, Eýropa chempıony, ıtalııalyq Manýel Lombardonyń osal tusyn taba almady.

Áıelderge keler bolsaq, 48 kg salmaqtaǵy Ábıba Ábý­jaqynovanyń Dohada jeńis tu­ǵyryna kóterilýine jaqsy múmkindigi boldy. Sońǵy kez­deri aıqyshty ónerimen kózge túsip júr­gen qazaqtyń qaı­sar qyzy ızraıldik Tamar Malka, mońǵolııalyq Baasanhý Bavýdorj jáne serbııalyq Mılısa Nıkolıchti utyp, óz jankúıelerin bir qýantqan edi. Biraq odan árige onyń áli jetpedi. Jartylaı fınalda Ábıba Eýropanyń eki dúrkin chempıony fransııalyq Shırın Boýklıge jol berdi. Qola medal úshin tartysta jerlesimiz ıtalııalyq Assýnta Skýttony jeńe almady. Nátıjesinde, bıyl­­ǵy jylǵy álemdik dodany Ábý­jaqynova besinshi orynmen qorytyndylady. Ázirge bul – Qazaqstan dzıýdoshylary arasyndaǵy eń táýir nátıje. Al ózge burymdylarymyz kóńil kónshiterlik nátıje kórsete almady.

Jarys jeńimpazdary men júldegerleri

(Erler)

60 kg: 1. Fransısko Garrıgos (Ispanııa), 2. Dılshodbek Batarov (О́zbekstan), 3. Georgıı Sardalashvılı (Grýzııa) men Lı Harım (Ońtústik Koreıa).

66 kg: 1. Hıfýmı Abe (Japonııa), 2. Dzıosıro Marýıama (Japonııa), 3. Iondonperenleın Bashý (Mońǵolııa) men Valıd Hııar (Fransııa).

73 kg: 1. Nıls Stýmp (Shveısarııa), 2. Manýel Lombardo (Ita­lııa), 3. Soıtı Hasımoto (Japonııa) men Mýrodjon Iýldashev (О́zbekstan).

(Áıelder)

48 kg: 1. Nasýmı Sýnoda (Japonııa), 2. Shırın Býklı (Fransııa), 3. Vakana Koga (Japonııa) men Assýnta Skýtto (Italııa).

52 kg: 1. Ýta Abe (Japonııa), 2. Dııora Keldııorova (О́zbek­stan), 3. Amandın Býshar (Fransııa) men Odette Djýffrıda (Italııa).

57 kg: 1. Krısta Degýchı (Kanada), 2. Harýka Fýnakýbo (Ja­ponııa), 3. Enhýrlen Lhagvtago (Japonııa) men Djesıka Klımkaıt (Kanada).