Elordada búırek aýrýlaryn emdeý qyzmetiniń tolyq jıyntyǵyn usynatyn skandınavııalyq «Dıaverým» medısınalyq kompanııasynyń Qazaqstan jáne Ortalyq Azııadaǵy alǵashqy sıfrlyq dıalız klınıkasy ashyldy. Emdeý ortalyǵynyń resmı ashylý saltanatyna Densaýlyq saqtaý vıse-mınıstri Vıacheslav Dýdnık, Shvesııa Koroldiginiń Qazaqstandaǵy elshisi Eva Pýlano jáne «Dıaverým Grýp» kompanııasynyń prezıdenti Dımıtrıs Mýlavasılıs qatysyp, medısınalyq mekemeniń mol múmkindigimen tanysty.
Memleket basshysy Qasym-Jomart Toqaev óziniń halyqqa Joldaýynda, oblystaǵy jurtshylyqpen kezdesýlerinde elimizdegi densaýlyq saqtaý salasyna aıryqsha kóńil bólý kerek ekenin, onyń ishinde sıfrlandyrý júıesine basa mán berip, ony jyldam damytý men odan ári jetildirýdi qajet etetinin jıi tilge tıek etedi. Osyǵan baılanysty Astanada Qazaqstan men Shvesııa Koroldiginiń yntymaqtastyq jumysynyń aıasynda alǵashqy sıfrlyq dıalız klınıkasy iske qosyldy.
«Shvesııa Koroldigi men Qazaqstan arasyndaǵy dıplomatııalyq qatynastyń, eki eldiń densaýlyq saqtaý salasyndaǵy júıeli jumysynyń nátıjesinde Ortalyq Azııa memleketteriniń ishinde Qazaqstanda búırek aýrýlaryn emdeıtin «Dıaverým» medısınalyq ortalyǵynyń alǵashqy sıfrlyq dıalız klınıkasy ashylyp otyr. Rasymen, keıingi jyldary Qazaqstan men Shvesııa densaýlyq salasyn modernızasııalaý boıynsha aýqymdy jumys atqaryp keledi. Sonyń bir ǵana mysaly, bıyl Qazaqstannyń 100-den asa stýdenti Shvesııanyń bedeldi medısınalyq ýnıversıtetinde bilim alady. Bul – keıingi jyldarmen salystyrǵanda rekordtyq kórsetkish», deıdi Eva Pýlano.
1964 jyly negizi qalanǵan jáne álemniń 23 elinde 440-tan asa klınıkasy bar Shvesııanyń «Dıaverým» medısınalyq uıymy Qazaqstannyń densaýlyq saqtaý salasyndaǵy tanymal jáne asa iri sheteldik ınvestor sanaldy. Kompanııa búkil álem boıynsha, sonyń ishinde Qazaqstanda búırek aýrýlary kezinde kómek kórsetý qyzmetterin sıfrlandyrýǵa aıtarlyqtaı úles qosyp keledi. Kompanııa búırek aýrýlaryn emdeý qyzmetteriniń tolyq jıyntyǵyn usynady jáne júıeni odan ári jaqsartý boıynsha Úkimetpen birlese otyryp jumys isteıdi. Klınıkalar meılinshe shalǵaı aýdandarda turatyn naýqastarǵa kómektese alatyn perıtonealdy dıalız sekildi balamaly emdeý túrlerin de usynady.
Qazir «Dıaverým» medısınalyq uıymy Qazaqstannyń 16 óńirindegi 53 klınıkada 2 800-den asa pasıentke qyzmet kórsetedi. Munda 1 myńnan asa jergilikti kásibı qyzmetker jumys isteıdi. Sonymen qatar medısınalyq uıymnyń Astana, Almaty, Qaraǵandy, Aqtóbe, Oral, Shymkent jáne Qostanaı sekildi iri qalalaryndaǵy ortalyqtarynan bólek, shalǵaı jatqan aýyldarda da klınıkalary jumys isteıdi. Atap aıtqanda, Qyzylorda oblysyndaǵy Qazaly men Jańaqorǵan, Qaraǵandy oblysyndaǵy Balqash, Topar jáne Qarqaraly, Túrkistan oblysyndaǵy Jetisaı men Asyqata, Jambyl oblysyndaǵy Býrnoe jáne Batys Qazaqstan oblysyndaǵy Aqsaı eldi mekenderinde bar.
«Memleket basshysy, úkimet keıingi jyldary densaýlyq salasyna kóp kóńil bólip keledi. 2021 jyly biz tórt baǵyt boıynsha jumys isteıtin «Deni saý ult» ulttyq jobasyn qolǵa alǵan edik. Iаǵnı bul degenimiz – Qazaqstan boıynsha qoljetimdi jáne sapaly medısınalyq kómek kórsetý, epıdemıologııalyq boljaý men den qoıýdyń qazirgi zamanǵy júıesin qalyptastyrý, otandyq óndiristiń qoljetimdi dárilik zattary men medısınalyq buıymdar jáne salaýatty ómir saltyn ustanatyn halyqtyń úlesin arttyrý jáne buqaralyq sportty damytý. Mine, osy jobalardyń aıasynda Densaýlyq saqtaý mınıstrligi qarjylandyratyn shvedtik joǵary tehnologııaly sıfrlyq jabdyǵy bar «Dıaverým» klınıkalarynda otandastarymyz aqysyz, sapaly jáne qaýipsiz em ala alady. d.CARE mobıldi qosymshasy arqyly pasıentter ózderiniń hal-jaıymen, suıyqtyqty tutynýymen jáne klınıka tájirıbesimen bólise otyryp, medısına qyzmetkerlerimen baılanysa alady. Sonymen qatar olar ózderiniń emdeý derekterine, zerthanalyq zertteý nátıjelerine jáne dári-dármekterge qatysty aqparatty da ala alady», deıdi Densaýlyq saqtaý vıse-mınıstri Vıacheslav Dýdnık.
Qazaqstandaǵy dıalız prosedýralarynyń 90%-y jekemenshik sektorlarda júrgiziledi. Sonyń 30%-y «Dıaverým» ortalyǵyna tıesili.