Qasym-Jomart Toqaev memlekette júrgizilip jatqan sot-quqyqtyq jáne ekonomıkalyq reformalardyń mańyzyna toqtalyp, bılik pen bıznes arasyndaǵy syndarly dıalogtyń qajettigin atap ótti, dep habarlaıdy Egemen.kz.
Memleket basshysynyń aıtýynsha, «Halyq únine qulaq asatyn memleket» qaǵıdaty búginde naqty is júzinde júzege asyrylyp keledi. Sonymen qatar elde ınvestısııalyq daýlardy sheshýge qolaıly quqyqtyq jáne ınstıtýsıonaldyq orta qalyptasyp jatyr.
«Osynyń bári «Halyq únine qulaq asatyn memleket» qaǵıdatynyń naqty is júzindegi kórinisi ekeni kúmánsiz. Elimiz sot júıesi jáne quqyq qorǵaý salasyndaǵy túbegeıli reformalarmen qatar aýqymdy ekonomıkalyq ózgeristerdi júzege asyryp jatyr. Munyń memleketimiz úshin mańyzy aıryqsha. Iskerlik belsendilikti arttyrý maqsatynda, sonyń ishinde ınvestısııalyq daýlardy sheshý úshin qolaıly quqyqtyq ınstıtýsıonaldyq orta qalyptasýda. Sonyń arqasynda sot sheshimderiniń 80 paıyzyna jýyǵy ınvestorlardyń paıdasyna shyǵarylyp jatyr», dedi Qasym-Jomart Toqaev.
Memleket basshysy: Elimizdegi sot tájirıbesi úshin de betburys kezeńi bastaldy
Prezıdent otandyq jáne sheteldik ınvestorlarmen kezdesýlerde bılik pen bıznes ókilderiniń ózara ashyq baılanys ornatýy mańyzdy ekenin aıtty.
«Men otandyq jáne sheteldik ınvestorlarmen kezdesýler kezinde únemi myna máselege aıryqsha nazar aýdaramyn: bılik jáne bıznes ókilderi ózara syndarly baılanys ornatýy kerek, olar ózekti túıtkilderdi ashyq talqylap, sheshý joldaryn birlese otyryp izdeýi qajet. Bılikte otyrǵan laýazymdy tulǵalarǵa tapsyrmam: ár daýly jaǵdaıda mámilege keletin joldy izdeý kerek, biraq bul jol zańnama júıesine nuqsan keltirmeýi qajet. Basqa sózben aıtqanda, ár kelisimniń zańdyq shekteýi bolýǵa tıis. Atap aıtý kerek, kassasııalyq sottardy qurý bastamasy dál osyndaı jıynnyń birinde kóterilgen bolatyn», Prezıdent.
Eske sala keteıik, búgin Memleket basshysy jańa Konstıtýsııa erejelerin júzege asyrý maqsatynda bes konstıtýsııalyq zańǵa qol qoıdy.