Búgin Ortalyq kommýnıkasııalar qyzmeti alańynda baspasóz konferensııasy ótip, «Mashına jasaý — jańa tehnologııalar men ınnovasııalardy damytýdyń draıveri»taqyrybynda ótken Qazaqstan mashına jasaýshylarynyń XI forýmynyń qorytyndysy shyǵaryldy, dep habarlaıdy Egemen.kz.
«Mashına jasaý salasy — kez kelgen ındýstrıaldy damyǵan memleket ekonomıkasynyń mańyzdy bólshegi. Jabdyqtar, mashınalar, túrli aspaptar, sondaı-aq halyqqa arnalǵan taýarlardyń barlyq túrin óndire otyryp, mashına jasaý kesheni ekonomıkanyń barlyq negizgi salalaryndaǵy qyzmettiń turaqtylyǵyn qamtamasyz etedi», dep atap ótti QR Indýstrııa jáne ınfraqurylymdyq damý vıse-mınıstri Ilııas Ospanov.
Búgingi tańda Qazaqstan ónerkásibinde mashına jasaý 6%, IJО́ boıynsha 1,5 paıyzyn qamtıdy. Atalǵan salada 4 myńǵa jýyq kásiporyn jumys isteıdi. Sonymen qatar bıyl quny shamamen 230 mlrd teńge bolatyn 36 jobany iske asyrý josparlanyp otyr.
Salany odan ári damytý úshin Memleket basshysynyń tapsyrmasy boıynsha mashına jasaýdy damytý jónindegi keshendi jospar ázirlenýde. Osy oraıda mańyzdy qujatty ázirleýge qatysty tolyq aqparatpen «Qazindustry qazaqstandyq ındýstrııa jáne eksport ortalyǵy» AQ Basqarma tóraǵasynyń orynbasary Álıhan Abakanov bólisti.
«Mashına jasaý salasynyń ınvestısııalyq tartymdylyǵyn odan ári arttyrý, onyń básekege qabilettiligin nyǵaıtý maqsatynda Memleket basshysynyń tapsyrmasy boıynsha tıisti keshendi jospar ázirlenýde. Ony tabysty iske asyrý salanyń damýyna qýatty serpin beredi jáne elimizdiń turaqty ındýstrııalyq ósýine mańyzdy úles qosady dep kútilýde. Bıyl QR IIDM taý-ken metallýrgııa, elektrotehnıka, munaı-gaz, temirjol, aýylsharýashylyǵy mashına jasaý salalary boıynsha 7 jumys toby quryldy. Keshendi jospardyń árbir bóligi egjeı-tegjeıli talqylanyp keledi», dedi A.Abakanov.
О́z kezeginde Qazaqstan mashına jasaýshylar odaǵynyń atqarýshy dırektory О́mirserik Erjanov mashına jasaý kásiporyndaryn qoldaý jónindegi memlekettik sharalar týraly aıtyp berdi.
«Bul forým salany órkendetýge yqpal etetin tyń tásilder tabýǵa arnalǵan tıimdi dıalog alańyna aınaldy. Álbette, qazaqstandyq mashına jasaý óńdeý ónerkásibinde jetekshi ról atqarady. Mashına jasaý salasyn damytý sheńberindegi jumys jalǵasatyn bolady», dedi otandyq mashına jasaýshylar odaǵynyń ókili.
Jıyndy qorytyndylaı kele spıkerler forým aıaqtalǵan soń Qazaqstan Respýblıkasynyń Úkimetine usynymdar joldanatynyn aıtty.