Arnaıy komıssııa otyrysynda qurylys kodeksine qatysty qujattar qaraldy. Jańa zań jobasy qurylys salasyndaǵy máselelerdi sheshýge baǵyttalǵan, dep habarlaıdy Egemen.kz IIDM baspasóz qyzmetine silteme jasap.
Elimizde Memleket basshysynyń tapsyrmasy boıynsha jańa Qala qurylysy kodeksi ázirlenip jatqany belgili. Osy rette qurylys salasy ulttyq ekonomıkanyń júıe quraýshy sektory sanalatynyn atap ótken jón. Qazir Qazaqstandaǵy sáýlet-qurylys qyzmeti 2,5 myńnan astam qujatpen rettelip keledi.
«Búginde sáýlet, qala qurylysy jáne tutastaı qurylys salasy kóptegen zańnamalyq jáne zańǵa táýeldi aktimen jumys istep jatqany málim. Bul oraıda joǵaryda atalǵan kodeksti qabyldaý arqyly qurylys baǵytyndaǵy kókeıkesti máseleler sheshilip, ornyqty zańnyń kúshimen salany turaqty damytýǵa jol ashylady», dedi A.Idyrysov.
Sonymen qatar jekelegen máseleler azamattyq, ekologııalyq, orman, sý jáne jer qatynastary týraly zań normalarymen retteletinin aıta keteıik.
«Jerdi ońtaıly paıdalanýdan bólek qala qurylysy qyzmetin quqyqtyq turǵyda retteýdiń mańyzdy aspektisi keshendi jáne tıimdi aýmaqtyq josparlaý, túrli shekteýler men ákimshilik kedergilerdi joıýǵa yqpal etý sanalady. Nege deseńiz, ol turǵyn úı qurylysynyń baǵasyna da áser etedi. Osyǵan baılanysty qalalyq qurylystyń prosesin quqyqtyq retteýdiń tyń tásilderi men tetikteri qajet», dedi vıse-mınıstr.
Sondaı-aq osy kodeksti qabyldaý arqyly sáýlet, qala qurylysy jáne tutastaı qurylys salasyn údemeli damytyp, ony sapaly jańa deńgeıge shyǵarý úshin túıindi mańyzdy máselelerdiń sheshimin taýyp, atalǵan salany jolǵa qoıý kózdelip otyr.