Majarstannyń Seged qalasynda uıymdastyrylǵan baıdarka men kanoede eskek esýden Álem kýboginde elimizdiń sportshylary eki altyn medal jeńip aldy.
Sportty damytý dıreksııasynyń málimeti boıynsha, jarystyń sońǵy kúninde Sergeı Emelıanov pen Rýfına Iskakova (C2 mix) juptyq synda 500 metrge jarysyp, márege birinshi bolyp jetti. Otandyq jup kanoede bul qashyqtyqty 1:51.97 sekýndta júzip ótti. Keıingi oryndardy Polsha men Majarstan quramasynyń sportshylary ıelendi. Juptyq synnyń fınalynda taǵy bir jerlesterimiz óner kórsetip, júldege synyq súıem jetpeı, 4-satyda qalyp qoıdy. Tımofeı Emelıanov pen Margarıta Torlopova fınalda 1:53.62 sekýnd nátıje kórsetti.
Osynyń aldynda Marııa Brovkova 1000 metrge jarysta aldyna jan salmaǵan edi. Osylaısha, Qazaqstan quramasy álem kýboginde 2 altyn medal oljalap, jalpykomandalyq esepte 8-oryn aldy.