Bul kúnderi Apennın túbeginde «Djıro d’Italııa» kópkúndigi ótip jatqany belgili. Keshe veloshabandozdar bir kún demalyp, jarys jolyna qaıta shyqty. Álemdik grand-týrdyń toǵyzynshy kezeńinen keıin byltyrǵy «Ispanııa Výeltasynyń» jeńimpazy, «Soudal Quick-Step» komandasynyń 23 jastaǵy belgııalyq veloshabandozy Remko Evenepýl kósh bastap keledi. Onyń ýaqyt kórsetkishi – 34 saǵat 33 mınýt 42 sekýnd.
Úsh aptaǵa jalǵasatyn Apennın túbegindegi veloshabandozdar básekesine «Astana Qazaqstan» velokomandasynyń ókilderi de qatysyp jatyr. Olımpıada chempıony Aleksandr Vınokýrov jetekshilik etetin «Astana» komandasy sapynan osy jarystyń buǵan deıingi birneshe kezeńinde top jaryp, úzdikter qatarynan kóringen 37 jastaǵy brıtanııalyq sprınter Mark Kevendısh, 24 jastaǵy ıtalııalyq Samýele Battıstella, 31 jastaǵy amerıkalyq Djo Dombrovskı, 29 jastaǵy ıtalııalyq Djannı Moskon, 24 jastaǵy otandasymyz Vadım Pronskıı, 39 jastaǵy ıspanııalyq Lýıs-Leon Sanches, 25 jastaǵy ıtalııalyq Krıstıan Skaronı jáne 27 jastaǵy taǵy bir ıtalııalyq veloshabandoz Sımone Velasko kósh basynan kórinýge tyrysyp jatyr.
114 jyldyq tarıhy bar «Djıro d’Italııa» dodasynda «Astana» velokomandasynyń jeńispen órilgen tamasha dástúri bar ekenin jankúıerler jaqsy biledi. Máselen, 2008 jyly «Astana» sapynda óner kórsetken Ispanııanyń dańqty veloshabandozy Alberto Kontador óz karerasynda alǵash ret «Djıro d’Italııa» jarysynda jeńimpaz atansa, 2013 jyly Italııanyń áıgili veloshabandozy Vınchenso Nıbalı úzdik shyqty. Sondaı-aq ol araǵa úsh jyl salyp 2016 jyly bul jetistigin qaıtalap, «Astana» jankúıerlerin taǵy bir márte qýantty. Jer-jahannyń jankúıerleri «Akýla» dep atap ketken dańqty veloshabandoz byltyr «Astana» sapyna qaıta oralyp, óziniń sporttyq mansabyn aıaqtaǵan edi. Vınchenso Nıbalı karerasyn bekerge Qazaqstan komandasy sapynda aıaqtaýǵa sheshim qabyldaǵan joq. О́ıtkeni sporttyń dál osy túrindegi eń aıtýly jeńisterine «Astana» sapynda óner kórsetip júrgen kezinde qol jetkizgen edi. Atap aıtqanda, 2013 jyly «Astanaǵa» kele salyp «Tırreno-Adrıatıko» týrynda, 2014 jyly «Týr de Frans», 2013 pen 2016 jyldary «Djıro d’Italııa», 2015 jyly «Djıro dı Lombardııa» týrlarynda dara shyqqan bolatyn.
О́kinishke qaraı, Alberto Kontador, Vınchenso Nıbalı sekildi dańqty veloshabandozdar komandadan ketken soń «Astananyń» da top komandalar arasynda top bastaýy azaıdy. Aleksandr Vınokýrov sol olqylyqtyń ornyn toltyrý úshin, «Astananyń» abyroıyn qaıta tikteý úshin jyl basynda komandaǵa Ulybrıtanııanyń áıgili veloshabandozy, kóptegen asa iri halyqaralyq jarystyń jeńimpazy ári júldegeri, álemdegi eń úzdik sprınterlerdiń biri ári biregeıi Mark Kavendıshti shaqyrǵan bolatyn.
«Týr de Frans», «Djıro d’Italııa» jáne «Ispanııa Výeltasy» sekildi eń beldi ári mártebeli jarystardyń barlyǵynda eń úzdik sprınterge tıesili arnaıy syılyqtardy ıelengen Mark ázirge «Djıro d’Italııa» jarysynda jarqyrap kórine alar emes. 38 jastaǵy veloshabandoz qazirgi tańda jalpy esepte 156-orynda keledi. Kóshbasshy Remko Evenepýlden eki saǵatqa jýyq qalyp qoıyp otyr. Degenmen Mark Kavendısh sprınterlerge arnalǵan besinshi kezeńde márege tórtinshi bolyp jetkenin aıta ketý kerek. Sonymen qatar ol sprınterler básekesinde 18 upaı jınap, 11-orynǵa jaıǵasqan.
Al ázirge «Astana» sapyndaǵy eń úzdik nátıje ıtalııalyq veloshabandoz Sımone Velaskoǵa tıesili. Toǵyz kezeńniń qorytyndysy boıynsha ol 22-satyda tur. Alda áli 11 kezeń bar ekenin eskersek, bizdiń el komandasynyń ókilderin budan da joǵary oryndardan kórip qalýymyz ábden múmkin.