Fınlıandııanyń Tampere jáne Latvııanyń Rıga qalalarynda ótip jatqan shaıbaly hokkeıden álem chempıonatynda Qazaqstan ulttyq quramasy qatarynan ekinshi oıynda jeńildi. Ǵalym Mámbetalıev shákirtteri úshinshi týrda Olımpıada oıyndary men álem chempıonattarynyń birneshe dúrkin júldegeri, V tobynyń kóshbasshysy Shveısarııa hokkeıshilerimen sheberlik baıqasyp, bul joly da iri eseppen qarsylastaryna jol berdi.
Alǵashqy týrda Norvegııany býllıtte tize búktirip (4:3), ekinshi týrda Chehııadan jeńilgen (5:1) jerlesterimiz úshinshi týrda taǵy da jeńilýge májbúr boldy. «Rıga arenada» ótken kezdesý 5:0 esebimen eýropalyqtardyń paıdasyna sheshildi. Bizdiń taza qazaqstandyqtardan jasaqtalǵan jas quramamyz kezdesýdi belsendi bastaǵanymen, shveısarııalyqtardyń qarqynyna nebári bes-aq mınýt tótep berýge shamalary jetti.
Kezdesýdiń besinshi mınýtynda 24 jastaǵy qorǵaýshy Tobıas Gaısser oıynnyń esebin ashsa, ekinshi kezeńde Fabrıs Gersog (27-mınýt) pen Demıen Rıat (31) dáldik tanytyp, Shveısarııanyń basymdyǵyn naqtylaı tústi – 3:0. Úshinshi kezeńde jerlesterimiz Chehııamen ótken oıyndaǵydaı jıi tártip buzyp, eki mınýttyq kishi aıyppen úsh márte jazalandy. Nátıjesinde, qarsylastar san basymdyǵyn tıimdi paıdalanyp, Andreı Shýtovtyń qaqpasyna taǵy eki shaıba engizdi. Bul joly Nıno Nıderraıter (41) men Romen Lıoffel (49) mergendigimen kózge tústi.
Úshinshi týr oıyndarynan keıin V tobynyń týrnır kestesinde birde-bir oıynda jeńilmegen Shveısarııa hokkeıshileri 9 upaımen jeke-dara kósh bastady. Ekinshi orynda 8 upaı bar Kanada keledi. Al úzdik úshtikti Chehııa quramasy túıindep tur. Olardyń enshisinde – 7 upaı bar. Qazaqstan hokkeıshileri eki upaımen jetinshi orynǵa jaıǵassa, soqyr upaıy joq Slovenııa kósh sońynda qalyp qoıdy.