Kórkem gımnastıkadan elordada uıymdastyrylǵan VI jazǵy spartakıada óz máresine jetip, júzden júırik shyqqan el úzdikteri anyqtaldy. Bas shaharda ótkizilgen jyldyń basty jarysynda elimizdiń ár óńirinen kelgen eń úzdik 54 gımnast synǵa túsip, túrli-tústi júldelerdi sarapqa saldy. Sonymen qatar toptyq jattyǵýda 12 komanda óz ónerlerin ortaǵa saldy. Bul qatarda Eljana Tanıeva, Erıka Jaılaýova, Mılana Parfılova syndy halyqaralyq básekelerde el namysyn qorǵap júrgen ulttyq qurama ókilderi de bar.
Sportty damytý dıreksııasynyń málimeti boıynsha, shyǵyrshyqpen óner kórsetýde ulttyq qurama kóshbasshylary eshkimge des bergen joq. Bas júldeni halyqaralyq dárejedegi sport sheberi, 2022 jylǵy Azııa chempıony jáne eki dúrkin kúmis júldegeri shymkenttik Eljana Tanıeva jeńip alsa, taǵy bir Shymkent qalasynyń ókili, Álem kýbogi jarystarynyń júldegeri Mılana Parfılova kúmis júldege ıe bolsa, elordalyq Aıbota Ertaıqyzy qola medalge qol jetkizdi. Sonymen qatar Eljana Tanıeva dop jattyǵý boıynsha ótken saıysta da chempıon atansa, Aıbota Ertaıqyzy – ekinshi, elordalyq Erıka Jaılaýova úshinshi orynǵa ıe boldy.
Urshyq pen lenta jattyǵýynda da Eljana Tanıevaǵa teń keler qarsylas tabylmady. Kúmis júlde Mılana Parfılovanyń, qola medal Erıka Jaılaýovanyń enshisinde ketti. Kópsaıysta, ıaǵnı 4 quralmen óner kórsetýde ár baǵdarlamada turaqty nátıje kórsetken Erıka Jaılaýova altynnan alqa taqsa (115,450 upaı), shymkenttik Mılana Parfılova (111,700 upaı) men Baıan Qoıbaqar (102,950 upaı) úzdikter qatarynan kórindi. Bul saıysta fınalǵa 15 gımnast joldama alǵan bolatyn.
Al toptar arasyndaǵy jáne komandalyq kópsaıysta birdeı nátıje tirkeldi. Eki synda da Shymkent qalasynyń sportshylary óz myqtylyqtaryn taǵy bir márte dáleldese, odan keıingi oryndarǵa Astana men Almaty qalasynyń ujymy jaıǵasty.
Kórkem gımnastar saıysynyń ashylý saltanatynda Sportty damytý dıreksııasy dırektorynyń orynbasary, VI jazǵy spartakıadanyń bas tóreshisi Azamat Imashev, Astana qalasy Dene shynyqtyrý jáne sport basqarmasynyń basshysy Samat Jylqybaev, federasııanyń bas hatshysy qatysyp, sóz sóılegen.
«Bul – eldegi barlyq kórkem gımnast úshin jaýapty jarys. Jýyrda Portýgalııadaǵy Álem kýbogi kezeńinde sátti óner kórsetken ulttyq qurama sportshylary da osynda synǵa túsedi. Osy jarysta úzdik shyqqan sportshylar Fılıppınde ótetin Azııa chempıonatyna daıyndyqty bastaıdy. Al kúzde ózderińiz biletindeı, osy jyldyń basty básekesi – Azııa oıyndary bar. Sol synda gımnastarǵa zor senim artamyz», dedi Azamat Imashev.
Spartakıadanyń qorytyndysy boıynsha Shymkent qalasynyń gımnastary 7 altyn, 5 kúmis pen 1 qola medal oljalap, jalpykomandalyq esepte top jardy. Keıingi orynǵa Astana qalasynyń (1 altyn, 3 kúmis, 4 qola) sportshylary jaıǵassa, úzdik úshtikti Almaty qalasy (1 altyn, 1 kúmis, 2 qola) ókilderi túıindedi.