QR Ǵylym jáne joǵary bilim mınıstriniń 2023 jylǵy 10 mamyrdaǵy buıryǵymen Qazaqstan Respýblıkasy Prezıdentiniń janyndaǵy «Qazaqstan Respýblıkasynyń Ulttyq ǵylym akademııasy» KEAQ vıse-prezıdentteri bolyp Asqar Jumadildaev, Aqylbek Kúrishbaev, Lázzat Eralıeva, Takır Balyqbaev taǵaıyndaldy, dep habarlaıdy Egemen.kz.
Asqar Serqululy Jumadildaev – belgili qazaqstandyq matematık-ǵalym jáne qoǵam qaıratkeri, fızıka-matematıka ǵylymdarynyń doktory, professor, Qazaqstan Respýblıkasy UǴA-nyń akademıgi. Ol matematıka jáne ǵylym salasyndaǵy jetistikteri úshin kóptegen marapat pen grant alǵan.
Aqylbek Qajyǵululy Kúrishbaev – aýyl sharýashylyǵy ǵylymdarynyń doktory, professor. Osy saladaǵy jetistikteri úshin birneshe ret marapattalǵan. Ekonomıkany, ǵylymdy jáne joǵary bilimdi damytýǵa, sondaı-aq belsendi qoǵamdyq qyzmetke sińirgen eńbegi úshin «Qurmet» jáne «Parasat» ordenderimen marapattalǵan.
Lázzat Tasbolatqyzy Eralıeva – professor, medısına ǵylymdarynyń doktory, 2013 jyldan bastap «Medısına ǵylymdary» seksııasy boıynsha Reseı jaratylystaný akademııasynyń (RJA) korrespondent-múshesi. Ol –150-den astam maqalanyń, 2 ulttyq nusqaýlyqtyń, monografııalar men ádistemelik nusqaýlyqtardyń, sonymen qatar 4 ónertabys patentiniń avtory.
Takır Ospanuly Balyqbaev – fızıka-matematıka ǵylymdarynyń kandıdaty jáne pedagogıka ǵylymdarynyń doktory, óz salasynda aıtarlyqtaı tájirıbesi bar professor. Reseıdegi kásiptik bilim berýdi qoldaý qorynyń A.G.Nebolsın atyndaǵy syılyǵynyń laýreaty. 2018 jyly «Parasat» ordenimen marapattalǵan.