Jalpyulttyq sosıal-demokratııalyq partııasy fraksııasynyń múshesi Naýryz Saılaýbaı Aqparat jáne qoǵamdyq damý mınıstri Darhan Qydyrálige, Mádenıet jáne sport mınıstri Ashat Oralovqa balalar kontenti, otandyq anımasııalyq ónimderdi damytý týraly depýtattyq saýal joldady, dep habarlaıdy Egemen.kz.
Májilis depýtaty Naýryz Saılaýbaı otandyq kıno salasynda ózekti bolyp otyrǵan máseleni qaıta kóterip, balalarǵa arnalǵan ónimderdiń sanyn kóbeıtý qajet ekenin aıtty.
«Búgingi balalar – erteńgi bolashaǵymyz. Al qazir olar boıyna qandaı qundylyqtardy sińirip jatyr? Mýltfılm – tárbıe quraldarynyń biri. Alaıda fılosofııalyq máni men zamanaýı elementteri bar qazaqsha anımasııalyq fılmder áli de jetkiliksiz. О́zderińizge málim, qazir sheksiz ǵalamtor álemdik naryqqa jol ashyp jatyr. Ondaǵy aqparatty óskeleń urpaq talǵamaı tutynyp otyr. Máselen, búldirshinder ıýtýb jelisinen anımasııalyq beınelerdi ózderi taýyp qaraıdy. Esesine psıhologııasy qalyptasyp úlgermegen balalardyń tili shubarlanyp jatyr. «Álipti taıaq dep bilmeıtin» oıy bekimegen balalar, tipti, qaı sóz qaı tilge tıesili ekenin ajyrata almaıdy», dedi Májilis depýtaty.
Bul rette Naýryz Saılaýbaı álem naryǵyndaǵy ónimderdi tutynatyn balalar ulttyq qundylyqtardan bezetinin tilge tıek etti.
«Qazirgi tańda Qazaqstan aýmaǵynda 25 mýltkanal jumys istese, onyń 24-i sheteldik arnalar. Árbir eldiń jasaǵan ónimi óziniń dinine, mádenıetine, túsinigine saı bolady ǵoı. Sol sebepti sheteldik mýltfılmderdiń keıipkerleri balalardyń «ıdealyna» aınalyp otyr», dedi depýtat.
Májilis depýtaty «Balapan» telearnasyna básekeles bolarlyq arnalardyń ashylýy men otandyq anımasııanyń damýyna tıisti qarjy bólinbeıtinin qosa aıtty.
«Byltyr anımator Ǵalı Myrzashev Dımash Qudaıbergendi mýltfılmge prototıp retinde usynǵan edi. Sol beınede ulttyq qundylyqtarymyzdy kórsetkisi keldi. Alaıda otandyq ónimge qarjynyń joqtyǵy kedergi bolyp otyr», dedi Naýryz Saılaýbaı.
Depýtattyń aıtýynsha, qazaq mýltfılmi otandyq kınonyń tasasynda qalyp otyr. Bólinetin qarjynyń 80 paıyzy eresekterge arnalǵan kınonyń enshisinde ketedi. Arnaıy zańnyń joqtyǵy mýlfılmge bólinetin bıýdjetke de áser etedi.
Májilis depýtaty kıno men mýltfılmge baǵyttalatyn qarjyny bólek qarastyrýdy jáne Ámen Qaıdardyń atyn berip, jańadan arnaıy jeke stýdııa ashýdy usyndy.