Kúnniń shyjyp turǵanyna qaramastan, oblys ákimdiginiń aldyna О́skemenniń kópbalaly analary jınaldy. Keıbireýi qundaqtaǵy sábılerine deıin alyp shyqqan. Talaptaryna qulaq túrsek, buǵan deıin qala basshylyǵynan arendalyq páterlerin jekeshelendirip berýdi jáne úıdiń qurylysyndaǵy aqaýlardy jóndeýlerin suraǵan. Alaıda másele sheshilmegen kórinedi. Sol úshin de oblys ákimi Danıal Ahmetovke mán-jaıdy túsindirmek bolǵan.
Oblys ákimdiginiń aldyna toptasqan kópbalaly analardyń barlyǵy derlik – Ál-Farabı dańǵyly, №4 kópqabatty úıiniń turǵyndary. Úı osydan eki jyl buryn kópbalaly analarǵa berilgen. Bılik ókilderiniń aıtýynsha, jekeshelendirýge jatpaıdy. Jalpy, Shyǵys Qazaqstan óńirinde jekeshelendirýge jatpaıtyn 21 úı bar eken. Sonyń biri – osy kópbalaly analar turyp jatqan úı.
«Qystyń kúni úıdiń terezelerinen jel gýleıdi. 8-9-qabattarda sý bolmaı qalady. Jertóle únemi sýǵa tolyp ketedi. Sonyń kesirinen taraqan qaptaıdy. Elektr jaryǵy da únemi óshe beredi. Sonyń áserinen turmystyq tehnıkalarymyz kúıip kete beredi. Úshinshi jylǵa ketti, elektr máselesi áli rettelmegen. Úıdiń qabyrǵalary jarylyp jatyr. Sondaı-aq balalar oıyn alańyndaǵy qurylys tolyq aıaqtalmaǵan. Ýáde etken jumystarynyń birin de istemegen», deıdi kópbalaly ana Nazgúl Qunapııanova.
Iá, 19 shaǵyn aýdandaǵy úı qurylystarynyń sapasy syn kótermeı turǵanyn bilemiz. Qabyrǵalary qars aıyrylyp, qaptalǵan qańyltyrlary ushyp ketip jatqanyn da neshe kórdik. Sol sııaqty Ál-Farabı dańǵyly boıyndaǵy №4 úıdiń de sapasy syn kótermeıtin sekildi.
«Kópbalaly analarǵa úı berdik» dep aýyzdaryn toltyryp aıtady. Biraq bergen úıleriniń sapasy osy. Úıdi jekeshelendirip alsaq, ózimiz jónder edik. Jalǵa alyp otyrǵandyqtan, aqsha shyǵaryp jóndegimiz kelmeıdi. Kúnderdiń kúni «arenda ýaqyty aıaqtaldy» dep qýyp shyqpasyna kim kepil?» deıdi altyn qursaqty analardyń biri Araı Baıbatyrova.
Ákimdik aldyna jınalǵan analar osy atalǵan problemalardy oblys ákimine jetkizgileri kelgenimen, Danıal Ahmetov shyqqan joq. Ákim ókilderiniń aıtýynsha, qalada emes kórinedi. Ártúrli sala basshylary kelip, jumystyń júrgizilip jatqanyn túsindirgen boldy. Degenmen turǵyndar júrgizilip jatqan jumystardyń barlyǵy sóz júzinde ǵana desti biraýyzdan. Al aqjaýlyqty analarmen kezdesýge kelgen О́skemen qalasynyń ákimi Jaqsylyq Omar úı qurylysynyń aqaýlaryn jóndeý úshin jumystar júrgiziletinin aıtty. Sondaı-aq zańǵa ózgerister engizip, jekeshelendirý úshin depýtattar men mınıstrlikke hat joldaǵanyn jetkizdi.
«Sál sabyr etińizder! Eshkim ol úıdi bosatyńyzdar dep kele almaıdy. «Nurly jer» baǵdarlamasy qabyldanǵan kezde bul turǵyn úılerdi muqtaj adamdarǵa beriledi degen talaptar bolǵan. Solaı boldy da. Sizder qazir 4000 teńge men 10 000 teńge aralyǵynda ǵana tólep, mamyrajaı tura berýlerińizge bolady. Árıne, ózimizdiki bolsa deısizder. Ony túsinemiz. Sondyqtan memlekettik organdarǵa hat jazdyq. Ruqsatyn alsaq, bul máselemen aınalysamyz», degen qala basshysy Jaqsylyq Muqashuly turǵyndar aıtqan olqylyqtardy baryp kórdi.
Aıtqandaı, páterlerdegi aqaý, ketken olqylyqtar jýyq arada sheshiletinin aıtty. Turǵyndarmen birge redaksııa da bul máseleni nazarda ustaıtyn bolady. Alaıda páterlerdi jekeshelendirý suraǵy turǵyndar kútkendeı búgin-erteń oń nátıje bere qoımas. Sebebi bul – memlekettik baǵdarlama aıasynda kelisimshartpen berilgen úıler.
О́skemen