Isker áıelder múmkindigi

Jabyq formatta uıym­dastyrylǵan is-sharada Prezıdent Ákimshiligi basshysynyń orynbasary Aıda Balaeva áıelderdiń qoǵamǵa aralasýy turaqty ekonomıkalyq ósýdi qamtamasyz etetinin aıtty.

– Áıelder men qyzdardy qoldaý jáne damytý jobasyna ınves­tısııa salý – eldegi azamat­tardyń jaǵdaıyn jaqsartýdyń eń senimdi joly. USAID qyzdar 10 paıyzǵa kóbirek mektepke barsa, IJО́ orta eseppen 3 paıyzǵa ósedi dep esepteıdi. Bilimdi qyzdar bolashaq tabysynyń 90 paıyzyn otbasyna qaıta salady, al uldar nebári 35 paıyzyn salady. Zertteýler kórsetkendeı, az qamtylǵan otbasylardaǵy qyzdardy áleýmettik qorǵaýdy kúsheıtý jáne joǵary bilim alý úshin jeńildetilgen nesıe alýǵa qoldaý kórsetý negizgi fak­tor. Qazir Qazaqstanda júze­ge asyrylyp jatqan reformalar kesheninde áıelderdiń ekonomıkalyq múmkindikterin keńeıtý máseleleri erekshe oryn alady. Áıelder kásipkerliginiń serpindi sektory qalyptasty. Elimizdegi barlyq jumys istep turǵan shaǵyn jáne orta bıznes sýbektileriniń 43 paıyzyn áıelder basqarady. Olar osy saladaǵy barlyq jumys ornynyń úshten birin qamtamasyz etedi, – dedi Aıda Balaeva.

Halyqaralyq sarapshylar qaýymdas­tyǵynyń pikirinshe, elimizde qarastyrylǵan krıterııler aıasyndaǵy eń úlken jetistik – áıelder men erlerdiń mektepke jáne kásiptik bilimge qol jetkizýdegi tolyq teńdigi. Iаǵnı eldegi stýdentter arasynda áıelderdiń úlesi – 53,4, magıstrant­tar arasynda – 61, doktoranttar arasynda 63 paıyzdy quraıdy. Sonymen qatar basqarý deńgeıindegi joǵary bilim berý júıesinde 21 paıyz qyz-kelinshek bar. Jıyn barysynda Aıda Balaeva Qazaqstanda áıel­derdiń kómegimen júzege asyrylyp jatqan jobalarǵa keńinen toqtaldy.

– Qazir elde júzege asyry­lyp jatqan reformalar kesheninde áıelderdiń ekono­mıkalyq múmkindikterin keńeıtý máseleleri erekshe oryn alady. Áıelder kásipkerliginiń serpindi sektory qalyptasty. Elimizdegi barlyq jumys istep turǵan shaǵyn jáne orta bıznes sýbektileriniń 43%-yn áıelder basqarady. Olar osy saladaǵy barlyq jumys oryndarynyń úshten birin qamtamasyz etedi. Prezıdent janyndaǵy Áıelder isteri jáne otbasylyq-demografııalyq saıasat jónin­degi ulttyq komıssııanyń qaty­sýy­men áıelderdiń saıası jáne ekonomıkalyq ilgerileýi­ne arnalǵan jobalarǵa toqtal­ǵym keledi. «Samuryq-Qazyna» Ulttyq ál-aýqat qory kompanııa­larynyń dırektorlar keńesi, baqylaý keńesteri men atqarýshy organdardaǵy áıelder úlesin arttyrý maqsatynda «Genderlik teńdik» jobasy bas­taldy. Bul iri kompanııalardaǵy bıznesti basqarýdyń eń joǵary deńgeıi. Áıelder men qyzdardyń basqarýshylyq áleýetin jáne saıası mádenıetin damytý úshin «Tomırıs» uzaqmerzimdi aqpa­rattyq-bilim berý jobasy alǵash ret júzege asyrylyp keledi. Jobanyń basty maqsattarynyń biri – bel­sendi áıelderdi maqsatty oqytý úshin óńirlik sarapshylar pýlyn qurý, – dedi ol.

Jalpy, «Jahandyq isker áıelderdiń keńesi» – áıelderdiń bıznesi men ınves­tısııalaryn keńeıtý múmkindikterine arnalǵan jańa uıym. Onyń basty maqsaty – halyqaralyq naryqtardaǵy múmkindikterdi usyný, ınvestısııany qamtamasyz etý, iskerlik jáne transshekaralyq jobalardy keńeıtý, seriktestik pen jelini damytýǵa járdemdesý.

– Biz GBWC-de búkil álem boıynsha bıznes pen ınves­t­ı­sııalardaǵy áıel kóshbas­shylardy biriktirýge baǵyttalǵan halyqaralyq uıym retinde biregeımiz. Maqsatymyz – búkil álemdegi kóshbasshylardy bir shańyraq astynda biriktirý. GBWC-tiń alǵashqy plenarlyq otyrysy sheteldik ınvestorlar keńesiniń 35-shi plenarlyq otyrysy aıasynda ótedi. FIC plenarlyq otyrysy álemdik kóshbasshylar men ınvestorlardy ǵana emes, áıel kóshbasshylardy da biriktiredi. Ol úshin áıelderdi osy platformaǵa tartý kerek. Osylaısha, biz iskerlik jáne ınvestısııalyq jobalarda bir-birimizben yntymaqtasa alamyz. Sondyqtan biz álemniń túkpir-túkpirinen áıelderdi GBWC-ge qosylýǵa jáne Qazaqstannan bastap jańa naryqtar men múmkindikterdi zertteýge shaqyramyz, – dedi Jahandyq isker áıelder keńesiniń negizin qalaýshy, «Qazaqstandyq sheteldik ınvestorlar keńesi» qaýymdastyǵynyń dırektory Janna Baıdasheva.

Plenarlyq otyrysta Prezıdent Ákim­shiligi basshy­synyń orynbasary áıelderdi saıa­sı mansap qurýǵa jáne saıasatker áıel­derdiń jańa býynyn qalyptastyrýǵa da­ıyndaý boıynsha júıeli jumys júrgizilip jatqanyn da atap ótti.

– Bilim berý, densaýlyq saqtaý, jy­nys­tyq tárbıe berý, sýısıdtik minez-qulyqtyń aldyn alý, áleýmettik kásipkerlik daǵdylaryn damytý salalarynda qolaıly sıfrlyq ortany qurý úderisi júrip jatyr. Sonymen qatar Ulttyq komıssııa «TechnoWoman» qaýymdastyǵy jáne «BS Education» birlese otyryp, elektrondy kommersııa mektebin ashýǵa jáne 1 400 qazaq­standyq qolóner sheberine halyqaralyq jáne qazaqstandyq naryqtarda elektrondy kommersııa satýdy úıretý úshin tegin kýrstar ótkizýge úles qosty, – dedi ol.