Semeıdegi orman órtin aýyzdyqtaýǵa qatty jel kedergi keltirip tur. Tilsiz jaýmen kúres jumystary túngi ýaqytta da júrip jatyr. Bul týraly óńirde qurylǵan jedel shtabtyń jetekshisi Dmıtrıı Garıkov málim etti, dep habarlaıdy Egemen.kz Abaı oblysy ákimdiginiń baspasóz qyzmetine silteme jasap.
«Jeldiń kóterilip, jaǵdaı qıyndap barady. Qazir órt Tavrııa aýylyndaǵy Kashtak ormanshylyǵyna qaraı bet aldy. Tehnıkanyń 65%-y sonda jumyldyryldy. Al Ýspen ormanshylyǵynda shaǵyn órt oshaqtary shyǵyp jatyr. О́rtpen kúres negizinen túnde júrgizilip jatyr. Sonymen qatar Jernovka aýylynda ahýal órship tur, sebebi tehnıkany aýyl aýmaǵyna kirgizýde kedergi bar», dedi Dmıtrıı Garıkov.
Onyń aıtýynsha, órt sóndirýshilerdiń qazirgi mindeti – jalyndy eldi mekender aýmaǵyna jibermeý.
«Turǵyndar ázirge úılerinde, olar habardar. Tavrııa eldi mekeni qaýipti aımaq retinde qalyp otyr, óıtkeni jel sol jaqqa baǵyt aldy. Qazir oblys jáne qala ákimi Kashtak ormanshylyǵynda júr», deıdi ol.
Sonymen qatar jedel shtab basshysynyń aıtýynsha, tilsiz jaý Bestapaev jáne Ýspen ormanshylyǵyna iri zardap keltirgen.