Taılandtyń Raıong qalasynda ótip jatqan tas joldaǵy velosporttan Azııa chempıonatynyń kezekti kúninde jerlesimiz Evgenıı Fedorov jarys jeńimpazy atanyp, el qorjynyna altyn júlde saldy.
Byltyr Aýstralııadaǵy 23 jasqa deıingi veloshabandozdar arasyndaǵy álem chempıonatynda top jarǵan Evgenıı bıyl Azııa birinshiliginde de aldyna jan salmady. Otandasymyz 46 shaqyrymǵa jalǵasqan jarys jolyn 53 mınýt 28 sekýndta júrip ótip, bas júldeni ıelendi. Kúmis júlde jerlesimizden eki mınýtqa qalyp qoıǵan taıbeılik Serhıo Týdanǵa buıyrsa, qola medal mońǵolııalyq Saınbaıaryn Djambaljamtstyń enshisinde ketti.
Bul – Qazaqstan quramasynyń Azııa chempıonatyndaǵy úshinshi altyn medali. Buǵan deıin 23 jasqa deıingi veloshabandozdar arasyndaǵy saıysta Andreı Remhe máre syzyǵyn birinshi bolyp kesse, onyń aldynda jerlesterimiz aralas komandalyq synda (mıks) úzdik shyqqan bolatyn. Áıelder arasyndaǵy básekede Rınata Sultanova qola júldege ıe bolǵan edi.