Memleket basshysy «Ákimshilik ádilet jáne onyń quqyq ústemdigin qamtamasyz etý isindegi róli» atty halyqaralyq forýmda zań men tártip qaǵıdatyn ulttyq bolmysymyzdyń ajyramas bóligine aınaldyrýymyz kerek ekenin aıtty, dep habarlaıdy Egemen.kz.
«Sońǵy jyldary memleketimiz asa aýqymdy quqyqtyq jáne qoǵamdyq jańǵyrý jolyna tústi. Elimizde jańa saıası mádenıet qalyptasa bastady. Biz órkenıetti el retinde Zań men tártip qaǵıdatyn ulttyq bolmysymyzdyń ajyramas bóligine aınaldyrýymyz kerek. Barsha azamattarǵa, ásirese, jastarǵa zańdy qurmetteý, zańǵa baǵyný qajet ekenin qarapaıym tilmen jan-jaqty túsindirgen jón. Zańdy qadirleý, tártipti qoldaý, bul – ár adamnyń jarqyn ómirine jol ashatyn mańyzdy shart», dedi Prezıdent.
Osy oraıda ol jalpyulttyq referendýmda qabyldanǵan jańa Konstıtýsııamyzda osy negizgi qaǵıdat týraly anyq jazylǵanyn eske saldy.
«Qazaqstannyń Bas qujaty – barsha azamatqa teń múmkindik beretin ádiletti qoǵamnyń myzǵymas tuǵyry. Adam jáne onyń ómiri – elimizdiń Ata zańyna arqaý bolǵan basty qundylyq. Konstıtýsııada azamattardyń quqyqtary men bostandyqtaryn saqtaý, zań ústemdigin qamtamasyz etý, halyqtyń turmys sapasyn jaqsartý memlekettiń basty mindetteri retinde aıqyndaldy. Túptep kelgende, jańa turpatty el bolý jolyndaǵy árbir reforma, eń aldymen, halyqtyń qalaýymen, jurtshylyqtyń tikeleı qoldaýymen jasalady. Árıne, munyń barlyǵy bir sátte júzege aspaıtyny belgili», dedi Memleket basshysy.
Jańa Konstıtýsııanyń kúshine enýine 26 kún qaldy
Eske salaıyq, búgin Memleket basshysy 2026 jyldyń 15 naýryzynda qabyldanǵan Konstıtýsııanyń erejelerin júzege asyrý maqsatynda konstıtýsııalyq zańdarǵa qol qoıdy.