Bıyl dzıýdodan Qatardyń astanasy – Dohada ótken álem chempıonatynyń asa aýyr salmaq dárejesiniń fınalynda fransııalyq Teddı Rıner men beıtarap eldiń týy astynda óner kórsetken reseılik Inal Tasoev kúsh synasqan edi.
«Jan alysyp, jan berisken» aıqastyń negizgi ýaqyty teń aıaqtalyp, báseke golden-skorǵa ulasty. Erejege sáıkes osy kezeńde alǵashqy upaıdy kim alsa, jeńis soǵan berilýge tıis. Osy oraıda alǵyrlyq tanytqan Tasoev utymdy ádis jasady. Alaıda onyń bul áreketi tóreshiler nazarynan tys qaldy. Ile-shala Rıner qarsylasynyń osal tusyn taýyp ketti. Nátıjesinde, Fransııanyń dańqty dzıýdoshysy bas júldeni oljalasa, Reseıdiń myqtysy kúmis medaldy qanaǵat tutty.
Arada biraz ýaqyt ótkennen soń Halyqaralyq dzıýdo federasııasy (IJF) beınetaspany qaıta qarap shyǵyp, qazylardyń óreskel qatelikke boı aldyrǵanyn moıyndady. Osylaısha, ádildik ornap, Inal Tasoevqa da altyn medal tabys etildi. Soǵan sáıkes ol álemdik reıtıngtegi upaılaryn da túgendep aldy. Sóıtip, qazirgi kezde +100 kılo salmaq dárejesiniń chempıondyq ataǵyn bir emes, eki balýan ıelenip otyr. Dál osyndaı jaǵdaı buryn-sońdy dzıýdo kúresi tarıhynda bolmaǵan.
Esterińizge sala keteıik, 25 jastaǵy Soltústik Osetııanyń týmasy komandalyq saıysta eki ret álem chempıonatynyń qola júldegeri atanyp, Eýropa oıyndarynda top jardy. Jekelegen jarysta Inal Tasoevtyń qurlyq chempıony, qurlyqtyq oıyndardyń kúmis júldegeri, Dúnıejúzilik áskerıler oıyndary men áskerıler arasyndaǵy álem birinshiliginiń jeńimpazy degen ataqtary bar.
Al 34 jastaǵy Teddı Rıner Beıjiń jáne Tokıoda alaýy tutanǵan Olımpııa oıyndarynda qola alsa, London men Rıo-de-Janeıroda bas júldeni qanjyǵasyna baılady. Japonııanyń astanasynda ol Fransııa quramasynyń sapynda komandalyq jarysta aldyna jan salmady. Sondaı-aq «Qonjyq» álemniń 12 dúrkin (11 ret jekelegen saıysta, 1 ret komandalyq básekede) jáne Eýropanyń bes dúrkin chempıony degen ataqqa qol jetkizdi. О́ziniń ataq-dańqy jaǵynan búgingi tańda Teddımen jer-jahandaǵy birde-bir dzıýdoshy teńese almaıdy.