Shaıbaly hokkeıden bıylǵy álem chempıonatynda el quramasy keıingi 25 jylda alǵash ret sheteldik legıonerlersiz oınap, jergilikti jas hokkeıshilermen táp-táýir nátıjege qol jetkizdi. Bizdiń jigitter josparlanǵan jeti oıynnyń úsheýinde jeńiske jetip, ókinishke qaraı, tórt oıynda qarsylastaryna jol berdi. Alty upaımen óz tobynda altynshy oryn alǵan jerlesterimiz kelesi jyly da álemdik dodanyń elıtaly kezeńinde oınaýǵa múmkindik aldy.
Fınlıandııanyń Tampere men Latvııanyń Rıga qalalaryndaǵy muzaıdyndarda ótken álem chempıonatynda el namysyn 18-19 jastaǵy Maksım Mýhametov, Batyrlan Muratov, Maksım Mýsorov, Mádı Dıhanbek, Danıl Býtenko, Álıhan О́mirbekov, Artem Korolev, Abaı Mańǵysbaev, Tamırlan Gaıtamırov, Dinmuhamed Qaıyrjan sekildi jas jigitter qorǵap, barshaǵa qazaqtar da hokkeı oınaı alatynyn dáleldedi. Al bul jigitterdiń basym bóligi elordalyq «Barys» júıesiniń tárbıelenýshileri ekeni belgili.
Osy álem chempıonatynda olar nátıjeli oıyndarynyń arqasynda «Barystaǵy» legıonerlerdi komandadan yǵystyryp, Qurlyqtyq hokkeı lıgasynyń aldaǵy maýsymynda oınaı alatyndaryna barshanyń kózin jetkizdi. Alaıda «Barys» basshylyǵy bul jigitterden op-ońaı bas tartyp jatyr. Máselen, álem chempıonatynan keıin astanalyq komandadan qaqpashy Maksım Pavlenko, qorǵaýshylar Danıl Býtenko, Artıom Korolıov, shabýylshylar Maksım Mýhametov pen Nıkıta Mıhaılıs ketti. Bul – áli tek basy ǵana.
Nıkıta Mıhaılıstiń komandadan ketýi túsinikti. Ol buǵan deıin de komanda aýystyrǵysy, jańa ujymda baq synap kórgisi keletinin aıtyp júrgen bolatyn. Al bolashaǵynan úlken úmit kúttiretin jas shabýylshy Maksım Mýhametovti «Barys» basshylyǵy ne úshin ózderinde saqtap qalmaǵany múlde túsiniksiz. Tipti, oǵan komandada qalý týraly usynys ta jasalmaǵan eken. Mýhametov álem chempıonatynda úsh márte mergendigimen kózge túsip, Qazaqstan quramasynyń eń úzdik shabýylshysy atanǵan bolatyn. Endi shabýylshy aldaǵy bir maýsym Magnıtogorskiniń «Metallýrg» komandasynda óner kórsetedi.
Shaıba.kz ınternet basylymynyń málimeti boıynsha, el namysyn Qurlyqtyq hokkeı lıgasynda (QHL) qorǵaıtyn «Barys» klýbynyń basshylyǵy bıylǵy álem chempıonatynda oınaǵan birneshe hokkeıshige aılyq jalaqysy 250-300 myń teńge kólemindegi kelisimshart usynǵan eken. Al oǵan deıin bul hokkeıshilerge joǵary jalaqy tóleýge daıyn sheteldik komandalardan usynys túsken. Biraq otandastarymyz ózderin tárbıelep shyǵarǵan komandanyń usynysyn kútkenimen, kóńildegi jalaqy usynylmaǵan.
Eger «Barys» klýbynyń basshylyǵy aldaǵy ýaqytta jas hokkeıshilerge senim artatynyn, QHL oıyndarynda ózderin kórsetýge múmkindik beretinin aıtyp, olardan komandada qalýyn suraǵanda, atalǵan hokkeıshiler qarsylyq tanytpas edi. Tipti, olardy ózderinde ustap qalý úshin asa kóp kólemdegi qarajat ta qajet emes. Máselen, QHL-dyń byltyrǵy maýsymynda elordalyq ujym sapynda muzaıdynǵa shyǵyp, birde-bir shaıba soǵa almaǵan reseılik hokkeıshi Kırıll Maksımovke bir jylda 75 mıllıon teńge jalaqy tólengen. Al komandada nebári úsh-aq aı óner kórsetken 28 jastaǵy kanadalyq qorǵaýshy Krıstofer Bıgraske «Barys» 122 mıllıon teńge shyǵyndaǵan. Iаǵnı Kırıll aı saıyn 6 mıllıonnan asa aılyq alyp otyrsa, Krıstoferge 40 mıllıon teńge kóleminde jalaqy tólengen. Sheteldik oıynshyǵa jalaqy tólegende mıllıondap shyǵyndalýǵa daıyn «Barys» óz shákirtterine kelgende jylyna solardyń bir aıdaǵy jalaqysyn tóleýge sarańdyq tanytyp otyr.
Sonymen qatar jastardyń «Barystan» ketýine jalaqy máselesinen bólek, komandanyń qazirgi bas bapkeri Andreı Skabelkanyń da áseri bar ekeni aıtylyp jatyr. Sebebi, Belarýs mamany Qazaqstan hokkeı mektebiniń túlekterine kóp senim arta bermeıdi. Negizinen ol legıonerlermen oınaǵandy qup kóredi. QHL-dyń byltyrǵy maýsymynda Skabelka bıylǵy álem chempıonatynda jasyndaı jarqyldap, býllıtter serııasynda myqtylyq tanytqan qaqpashy Andreı Shýtovty «Nomad» klýbyna jiberip, ornyna jylyna 140 mıllıon teńge jalaqy alatyn slovakııalyq Iýlıýs Gýdachekti shaqyrtqan bolatyn. Al Shýtovtyń jalaqysy jylyna 5-6 mıllıon shamasynda. Sonymen qatar Andreı Skabelka Batyrlan Muratovqa da QHL-da ózin kórsetýge múmkindik bergen joq.
Osylaısha, basshylyqtan jáne bapkerler quramynan qoldaý tappaǵan jas hokkeıshilerimiz «Barys» klýbynan ketip jatyr.