Dúnıejúzilik reıtıngte 47-orynda turǵan Aleksandr Býblık pen álemniń 256-raketkasy Beıbit Juqaev Nıderland pen Pýerto-Rıkoda ótip jatqan tennıs týrnırlerin jeńispen bastady.
Nıderlandtyń Hertogenbos qalasynda jalaýy jelbiregen ATP 250 sanatyndaǵy jarystyń birinshi aınalymynda elimizdiń birinshi raketkasy Aleksandr Býblık belgııalyq Davıd Goffenmen sheberlik baıqasyp, eki sette – 7:5, 7:5 esebimen jeńiske jetti. Buǵan deıin jerlesimiz belgııalyq tennısshimen eki márte kezdesip, ekeýinde de qarsylasynyń myqtylyǵyn moıyndaýǵa májbúr bolǵan edi. Bul joly otandasymyzdyń baǵy jandy. Býblık keshe atalǵan týrnırdiń ekinshi aınalymynda álemdik reıtıngte 9-orynda turǵan ıtalııalyq Iаnnık Sınnermen kezdesti.
Pýerto-Rıkonyń Palmes del Mar qalasyndaǵy «Chellendjer» týrnırinde baq synap jatqan Beıbit Juqaev bastapqy básekesin álemniń 242-shi, osy jarystyń 6-raketkasy japonııalyq Iýta Shımızýmen ótkizip, qarsylasyn 6:3, 6:4 esebimen tize búktirdi.