Astanada balalar arasynda qyzylsha aýrýyn juqtyrǵandar kóbeıgen. Bul týraly elordanyń Sanıtarlyq epıdemıologııalyq baqylaý departamenti basshysynyń orynbasary Janna Pralıeva aıtty, dep habarlaıdy Egemen.kz.
Janna Pralıevanyń aıtýynsha, 13 maýsymdaǵy jaǵdaı boıynsha qalada 34 bala qyzylsha aýrýyn juqtyrǵan. Belgili bolǵandaı, olardyń ata-anasy qyzylshaǵa qarsy josparly ekpeden bas tartqan.
«О́kinishke qaraı, ata-analardyń ekpeden bas tartýy balanyń densaýlyǵyna ǵana emes, jaqyndaryna da qaýip tóndiredi. Qaladaǵy eki mektepke deıingi balalar uıymynda qyzylsha aýrýy tirkeldi. Birinshi jaǵdaıda qyzylshamen aýyrǵan bala tıisti ekpeni almaǵan 8 balaǵa juqtyrǵan. Al ekinshi jaǵdaıda bala ózinen basqa vaksına almaǵan 4 balaǵa juqtyrdy. Barlyq balanyń ata-anasy qyzylshaǵa qarsy vaksınadan bas tartqan», dedi J.Pralıeva.
Onyń aıtýynsha, qazir balalar «qyzylshanyń tıptik túri» dıagnozymen aýrýhanada jatyr. Olardyń jaǵdaıy kúrdeli dárejede, aýrý odan ári órshýi múmkin.
Osy oraıda Janna Pralıeva josparly profılaktıkalyq ekpelerden bas tartpaýdyń mańyzyn túsindirdi. Onyń aıtýynsha, ekpeniń áseri 95-97 paıyzǵa deıin jetedi.