Bul týraly Memleket basshysy Qasym-Jomart Toqaev Qazaqstan-Germanııa bıznes-forýmynda aıtty, dep habarlaıdy Egemen.kz Aqordanyń baspasóz qyzmetine silteme jasap.
«Biz SVEVIND Group kompanııasymen quny 50 mıllıard dollar bolatyn jasyl sýtegin óndirý jóninde kelisimge qol qoıdyq. Qazir bul – álemdegi eń iri jobalardyń biri. Qazaqstannyń osy salany damytý áleýeti áldeqaıda zor. Jasyl sýtegi óndirisi ekologııalyq taza bolat, alıýmınıı jáne basqa da metaldar óndirisine jol ashady. Germanııanyń joǵary tehnologııalyq sheshimderimen jáne Qazaqstannyń resýrstarymen biz, shyn máninde, aldymyzǵa bıik maqsattar qoıa alamyz», dedi Qasym-Jomart Toqaev.
Osy rette ol Germanııa – álemdegi jetekshi ınnovasııalyq ortalyqtardyń biri ekenin atap ótti.
«Bul el tehnologııa men ǵylym salasynda óte joǵary standarttardy engizýimen tanymal. Biz Eýrazııadaǵy óńirlik ınnovasııalyq jáne sıfrlyq ortalyq bolýǵa umtylamyz. Atalǵan salalardyń berik irgetasyn qalaýdy bastadyq. Qazaqstan sıfrlyq qyzmet kórsetý salasynda óńirlik kóshbasshy retinde joǵary baǵalanady. Osy maqsatta biz túrli baǵyttarǵa, sonyń ishinde tehnologııalyq jáne sıfrlyq zertteýlerge jáne startaptarǵa germanııalyq seriktesterimizdi shaqyrǵymyz keledi», dedi Qazaqstan Prezıdenti.
Budan soń, ol adamı kapıtal salasyndaǵy yntymaqtastyq jóninde sóz qozǵady.
«Bilim berý, biliktilikti arttyrý jáne bilim transferti mańyzdy sala sanalady. Bul baǵyttardy meńgermeı, básekege qabiletti bolý múmkin emes. Osy rette Shtaınmaıer myrzanyń erteń Aqtaý qalasyna sapary kezinde Kaspıı memlekettik ýnıversıteti janynan Qazaq-nemis ınjınırıng ınstıtýtynyń ashylýyn quptaımyn.
Sonymen qatar Shyǵys Qazaqstan tehnıkalyq ýnıversıtetiniń janyndaǵy Qazaq-nemis ǵylym jáne tehnologııalar ınstıtýty osy mańyzdy ındýstrııalyq óńirdegi adamı kapıtal men básekege qabilettilikti odan ári jetildirýge yqpal etedi. Bul ınstıtýttar ozyq logıstıka, jasyl sýtegi jáne jańartylatyn tehnologııalar úshin asa qajet paıdaly qazbalar óndirý sekildi negizgi salalar boıynsha mamandar daıarlaıdy», dedi Prezıdent.
Onyń aıtýynsha, túlekter Qazaqstan men Germanııa dıplomyn qatar alady. Bul eki el seriktestiginiń taǵy bir mańyzdy kezeńi bolmaq.