Qaıbir jyly áleýmettik jelide bir áriptesimiz «qazir aýyr atletterimiz bir jarystan júlde jeńip alsa qýanbaıtyn jaǵdaıǵa jettik. Qaıta sol medalin endi qashan qaıtaryp alady eken dep ýaıymdaıtyn boldyq» dep ázildep post jazǵany bar edi. Arada kóp ýaqyt ótpeı, sol ázili búginde shyndyqqa aınaldy. Sebebi kúni keshe elimizdiń Kók baıraǵyn álemdik arenada bıikke kóterip júrgen birneshe aýyr atletimizdiń qanynan tyıym salynǵan preparat tabylǵany anyqtalyp, júldeni qosymsha «kúshpen» jeńip alǵany belgili boldy.
Aýyr atletıka federasııasy taratqan málimet boıynsha dopıngpen ustalǵan sportshylardyń qatarynda 2018 jyly Ashǵabattaǵy álem chempıonatynyń kúmis júldegeri, 2021 jyly Tashkentte ótken jahan birinshiliginiń jeńimpazy, 2020 jylǵy sary qurlyq dodasynyń eki dúrkin qola jáne kúmis júldegeri, sonymen qatar Azııa chempıony degen dardaı ataǵy bar Arlı Chonteı, jýyrda ǵana Ońtústik Koreıanyń Chındjý qalasynda uıymdastyrylǵan Azııa chempıonatynyń altyn medal ıegeri, jastar arasyndaǵy Azııa chempıony jáne álem chempıonatynyń kúmis júldegeri, mamandar tarapynan Parıj Olımpıadasynda el qorjynyna júlde salýy múmkin degen sportshylardyń qatarynda bolǵan 23 jastaǵy Nurǵısa Ádiletuly, eresekter arasyndaǵy álem jáne Azııa chempıonatynyń qola júldegeri Alekseı Chýrkın, Azııa chempıonatynyń qola jáne kúmis júldegeri Artem Antropov, byltyrǵy jasóspirimder arasyndaǵy Azııa chempıonatynyń jeńimpazy Denıs Polýboıarınov, sonymen qatar jasóspirim qyzdar arasyndaǵy Azııa chempıonatynyń kúmis júldegeri Alına Kolıýshko men qola júldegeri Ekaterına Alıakına bar.
«12 maýsymda Aýyr atletıka federasııasy Halyqaralyq testileý agenttiginen (ITA) elimizdiń ulttyq quramasynyń sportshysy Artem Antropovtyń dopıng-synamasy oń nátıje kórsetkeni týraly habarlama aldy. Sportshy dopıng synamany 12 mamyrda Ońtústik Koreıada ótken Azııa chempıonatynan keıin tapsyrǵan bolatyn. Al ózge sportshylardan dopıng synama sáýir aıynda jarystan tys jaǵdaıda alynyp, onyń ishinde alty aýyr atletimizdiń qanynan tyıym salynǵan preparat tabylǵany anyqtalyp otyr. Búgingi kúni sportshylar dopıngke qarsy erejelerdi buzǵany týraly habarlama aldy. Olarǵa taǵaıyndalatyn jaza túri árqaısysy qoldanǵan preparatyn jáne tolyq tergeýdiń nátıjesi boıynsha qabyldanady. Joǵaryda atalǵan sportshylardyń barlyǵy qazirgi ýaqytta sporttyq is-sharalar men oqý-jattyǵý jıyndarynan ýaqytsha shettetildi.
Federasııa «taza sport» saıasatyn ustana otyryp, oqıǵany táýelsiz tekserý úshin komıssııa qurdy. Tergeý kezeńinde komıssııa quramy sportshylardyń dopıngti kez kelgen tamaq túri arqyly abaısyzda paıdalanǵanyn nemese dopıng ekenin bile tura qasaqana qoldanǵanyn anyqtaıdy. Tekserý úshin sportshylardan daıyndyq kezeńinde jegen, qabyldaǵan sporttyq tamaqtary men vıtamınderiniń úlgileri alyndy. Sondaı-aq sportshylarǵa «B» synamasyn qaıta tapsyrýǵa múmkindik jaǵyn berý de qarastyrylyp jatyr», delingen habarlamada.
Sonymen qatar federasııa sportshylardy tergeý jumystarynan bólek, jumysyna salǵyrttyq tanytqany úshin elimizdiń erler jáne áıelder qurama komandalarynyń bas jattyqtyrýshylaryn qyzmetinen bosatý týraly mınıstrlikke ótinish joldaǵany belgili boldy.
Dopıngke qarsy ulttyq ortalyǵynyń málimeti boıynsha jyl basynan beri 14 taý kótergen «tolaǵaıymyz» dopıngpen ustalyp otyr. Naýryz aıynda Tokıo Olımpıadasynyń qola júldegeri Igor Son bastaǵan jasóspirimder arasyndaǵy álem jáne Azııa chempıony Rahat Bekbolat, jasóspirimder arasyndaǵy álem jáne Azııa chempıonatynyń qola júldegeri Abylaı Áýelhanov jáne taǵy basqa sportshylarymyzdyń da dopıng qoldanǵany anyqtalyp, tórt jyldan segiz jylǵa deıin sporttan shettetilgen bolatyn.