Áıgili «Eýrosport» arnasy 3-16 shilde aralaǵynda tennısten Londonda ótetin Ýımbldon týrnıriniń basty favorıtteriniń esimderin atady. Úzdikter qatarynda Qazaqstannyń birinshi jáne álemniń úshinshi raketkasy Elena Rybakına da bar. Bul tizimde oǵan ekinshi oryn buıyrǵan eken.
Árıne, Rybakınanyń óneri tennıstiń jilik maıyn shaqqan sarapshylardyń tarapynan osylaısha joǵary baǵalanýy tegin emes. 24 jastaǵy jerlesimizdiń sońǵy jyldary tolaǵaı tabysqa qol jetkizip júrgenin jankúıerler jaqsy biledi. Byltyr Ulybrıtanııanyń astanasynda ótken dál osy týrnırde Elenanyń ekpinine eshkim shydaı almaǵan edi. Qarsy kelgenderdiń barlyǵyn sypyra utqan ol kúmis naýany tóbesine kóterip, san mıllıon jankúıerdiń qoshemetine bólendi. Sol kezde bul nátıje sensasııa retinde baǵalansa, keıinnen Rybakına óziniń myqtylyǵyn talaı dúbirli dodada moıyndatty. Byltyr ol Adelaıda (Aýstralııa) men Portorojedegi (Slovenııa) iri týrnırlerde fınalǵa deıin jetse, bıylǵy jyldyń basynda Melbýrnde uıymdastyrylǵan Aýstralııanyń «Úlken dýlyǵa» sanatyndaǵy ashyq birinshiliginiń aqtyq synynda óner kórsetti. Odan keıin 1000 upaılyq Indıan-Ýelss pen Rımdegi dodalarda dara shyǵyp, Maıamıde ekinshi oryn aldy. Osyndaı orasan zor kórsetkishteriniń arqasynda otandasymyz qazirgi kezde álemdik reıtıngte úshinshi oryndy ıelenip otyr.
«Eýrosporttyń» paıymdaýynsha, Elena Rybakınaǵa qaraǵanda Arına Sobolenkonyń Ýımblonda top jarýyna múmkindigi birshama joǵary. 25 jastaǵy Belarýstiń betkeustary bıyl Aýstralııanyń ashyq birinshiliginde aldyna jan salmady. Jyl saıyn US Open, Rolan Garros jáne Ýımbldonnyń jartylaı fınalyna deıin jetip júr. Asa iri halyqaralyq dodalarda 13 márte top jarǵan Sobolenko búgingi tańda WTA reıtınginde ekinshi oryndy ıelenýde.
Úshinshi orynda – Iga Sventek. 22 jastaǵy Polshanyń ókili biraz ýaqyttan beri álemdik reıtıngte jeke-dara kósh bastap keledi. Ol aınaldyrǵan úsh jyl aralyǵynda Rolan Garrosty (2020, 2022, 2023 jyldary) úsh ret utty. Byltyr US Open dodasynda dara shyǵyp, Aýstralııanyń ashyq birinshiliginiń jartylaı fınalyna deıin jetti. WTA týrnırlerinde 14 márte top jardy. Iga tek Ýımbldonda tabysty óner kórsete almaı júr. Polıak qyzy Londondaǵy jarystyń birde-bir ret tórtinshi kezeńinen aspaǵan. Bıyl Aýstralııanyń ashyq birinshiliginde dál osy Sventek bizdiń Elena Rybakınaǵa ese jibergen edi.
Tórtinshi jáne besinshi bolyp týnıstik Ons Jaber men chehııalyq Karolına Mýhovanyń esimderi atalady. Álemniń altynshy raketkasy atanyp otyrǵan 28 jastaǵy Jaber byltyr US Open men Ýımbldonnyń fınalynda oınady. WTA saıystarynda ol tórt ret bas júldeni oljalady. Álemdik reıtıngte 16-satyǵa jaıǵasqan 26 jastaǵy Mýhova bıyl Rolan Garrostyń fınalynda óner kórsetip, tórtkúl dúnıe jankúıerlerin tamsandyrdy. Parıjdegi dodada ol Iga Sventek pen Arına Sobolenkony san soqtyrǵanyn da aıta ketýge tıispiz. Oǵan deıin Chehııanyń ókili Melbýrndegi týrnırdiń jartylaı fınalynda kúsh synasty.