Fýtboldan 2024 jyly ótetin Eýropa chempıonatynyń irikteý týrnırinde Qazaqstan Danııadan keıin Soltústik Irlandııany utyp, qatarynan eki sensasııa tirkegeni bilgili. Al Islandııa men Portýgalııa quramalary Reıkıavıktegi «Lıoıgartalsvıotlıýr» ulttyq stadıonynda kúsh synasyp, bul báseke 1:0 esebimen qonaqtardyń paıdasyna sheshilgen edi.
Atalǵan matchta jeńis golyn 90-mınýtta Krıshtıaný Ronaldý soqty. Osy kúnge deıingi tórt básekeniń barlyǵyn jeńispen aıaqtaǵan Portýgalııa quramasy 12 upaı enshilep, J tobynyń jarys kestesinde jeke-dara kósh bastap tur. Osy kezdesýden keıin Ronaldýǵa óz eliniń ulttyq komandasynyń sapynda 200 oıyn ótkizgen oıynshy retinde Gınnestiń rekordtar kitabynyń arnaıy sertıfıkaty tabys etildi. Kúni búginge deıin jer-jahandaǵy birde-bir fýtbolshy dál osyndaı kórsetkishke qol jetkize alǵan joq edi.
Osy oraıda Portýgalııa quramasy sapynda Ronaldý óziniń alǵashqy matchyn Qazaqstanǵa qarsy ótkizgenin aıta ketken abzal. 2003 jyldyń 20 tamyzynda Shavısh qalasynda atalǵan eki komanda joldastyq kezdesý ótkizdi. Oıynnyń ekinshi taımynda 18 jastaǵy Krıshtıaný alańǵa shyqty. Bul báseke 1:0 esebimen alań ıeleriniń paıdasyna sheshildi. Jalǵyz goldy 65-mınýtta Sımaý Sabroza soqty. Al Ronaldýdyń ózi osy matchtyń eń úzdik oıynshysy dep tanyldy.
Ýaqyt oza Krıshtıaný álemdik fýtboldyń shoqjuldyzyna aınaldy. Ár jyldary ol «Sportıng» (2002-2003), «Manchester Iýnaıted» (2003-2009, 2021-2022), «Real Madrıd» (2009-2018), «Iýventýs» (2018-2021) klýbtary sapynda óner kórsetti. Talaı dúbirli dodada Portýgalııanyń namysyn abyroımen qorǵady. О́ziniń óreli óneri men teńdessiz sheberliginiń arqasynda kóptegen ataqty ıelendi.
Portýgalııa quramasy sapyndaǵy alǵashqy golyn Ronaldý 2004 jyly Eýropa chempıonatynyń toptyq týrnırinde soqty. Grekııaǵa qarsy kezdesýdiń ekinshi taımynda jasyl alańǵa shyqqan bolashaq juldyz qosymsha ýaqytta nysanany dál kózdedi. О́z eliniń bas komandasy sapynda jasyndaı jarqyldaǵan 20 jyl ýaqyt aralyǵynda Krıshtıaný 122 márte mergendik tanytyp, 43 ret nátıjeli pas berdi.
Statıstıkaǵa júginsek, Portýgalııa men Qazaqstan quramalary ózara úsh ret kúsh synasqan eken. «Eýro-2008» dodasynyń irikteý týrnırinde olar eki márte kezdesti. Pıreneı túbeginde ótken matchta alań ıeleri 3:0 esebimen jeńiske jetse, Almatydaǵy Ortalyq stadıondaǵy básekede jerlesterimiz 1:2 esebimen jeńilis tapty. Osy oıynnyń ekeýinde de Krıshtıaný Ronaldý gol soqty. Bizden Ronaldý sııaqty surmergen qashan shyǵar eken?