Bıyl Arqa tósinde boı kótergen ásem Astanaǵa 25 jyl tolyp otyr. Soǵan oraı Qalamgerler alleıasynda elorda ákimdigi men Qazaqstan Jazýshylar odaǵy Astana qalalyq fılıalynyń uıytqy bolýymen «Astana – shabyt arqaýy» atty mán-mazmunǵa toly mádenı is-shara ótti.
Asyly, Astananyń bedeli eldiń bas ákimshilik ortalyǵymen, kókpen talasqan bıik úılerimen, kózdiń jaýyn alar ǵımarattarymen, aınadaı jarqyraǵan túzý joldarymen, jasyl jelek kómkergen saıabaqtarymen, neshe túrli gúldiń hosh ıisi ańqyǵan gúlzarymen ǵana ólshenbeıdi, ondaǵy zııaly qaýymnyń salmaǵymen de ólshenedi. Osy jaǵynan kelgende, kindik qalanyń beti jaryq. О́ıtkeni elordada halqymyzdyń sút betine shyǵar zııalylarynyń bir shoǵyry jınalǵan. Olar bas shahardyń alǵashqy kirpishi qalanǵan kúnnen rýhanı-mádenı ortalyqqa aınalýyna zor úles qosty.
Halqymyz «ákimi aqynyn izdegen el baqytty» degen sózdi qalaı taýyp aıtqan. Búginde elordada Qazaqstan Jazýshylar odaǵynyń 160-tan astam múshesi turady. Olardyń arasynda qazaq ádebıetiniń qazynasyn súbeli týyndylarymen baıytqan qabyrǵaly qalamgerlerden bastap, kórkem sóz ónerine endi kelgen talantty jastar da bar.
Is-sharada alǵashqy bolyp sóz alǵan Astana qalasy ákiminiń orynbasary Eset Báıken elordanyń rýhanı ómiri týraly aıta kelip, onyń qalyptasýyna aıryqsha eńbek sińirgen aqyn-jazýshylar týraly oı tolǵady.
«Qazir elordada ult rýhanııatynyń bir-bir ýyǵyna aınalǵan qalamgerler turady. Olar bas qalanyń ǵana emes, elimizdiń rýhanı-mádenı ómiriniń damýyna aıanbaı qyzmet etti. Astana ákimdigi zııaly qaýymdy eshqashan nazardan tys qaldyrǵan emes. Jastardy da únemi qoldap otyrady. Osydan eki jyl buryn elordalyq 30 jas aqyn-jazýshynyń jınaǵy jaryq kórdi. Jaqynda respýblıkalyq jyr músháırasyn uıymdastyrdyq. Osyndaı ıgi is-shara jalǵasyn taba beredi. Búgin biz Astananyń 25 jyldyǵyna oraı bir top aǵa aqyn-jazýshyǵa syı-qurmetimizdi kórsetip otyrmyz», dedi qala ákiminiń orynbasary.
Sóıtip, «Astana – shabyt arqaýy» atty mádenı is-shara aıasynda Tólen Ábdik, Qoıshyǵara Salǵarauly, Ǵarıfolla Esim, Serik Turǵynbekuly, Aldan Smaıyl, Mádı Aıymbet, Álibek Asqar, Qaısar Álim, Qýanysh Jıenbaı, Tursyn Jurtbaı, Altynshash Jaǵanova, Shárbaný Beısenova bastaǵan 80-ge jýyq tanymal qalamgerge Astana ákiminiń qarjylaı granty tabys etildi. Buǵan aǵa býyn qalamgerler bir serpilip qaldy. Belgili jazýshy, qoǵam qaıratkeri Altynshash Jaǵanova elordanyń rýhanı kelbeti men álem aldyndaǵy abyroı-bedelin qalyptastyrýǵa talmaı eńbek etip kele jatqan kórkem sóz zergerlerine qurmet kórsetken qala ákimdigine rızashylyǵyn jetkizdi.
Osy ıgi istiń basy-qasynda júrgen aıtýly aqyn, Qazaqstan Jazýshylar odaǵynyń Astana qalalyq fılıalynyń dırektory Dáýletkereı Kápulynyń aıtýynsha, aldaǵy elorda merekesinde osyndaı syı-qurmet 25 jas aqyn-jazýshyǵa kórsetilse, 25 qazan – Respýblıka kúninde qalǵan alpysqa jýyq qalamger ákim grantyn alady.
«Budan 3-4 jyl buryn Almatyda turatyn barlyq qalamgerge Almaty ákiminiń stıpendııasy tabys etildi. Bizge de bul oı saldy. Sodan beri osy máseleni kóterip kelemiz. Jaqynda Astana ákimi Jeńis Qasymbektiń qabyldaýynda bolǵanda, osyny taǵy kóterdim. Mine, nátıjesin kórip otyrmyz. Bıyl elordaǵa 25 jyl tolyp otyr. Bas qalanyń rýhanı turǵydan qalyptasýyna qalamgerler kóp eńbek sińirdi. Muny soǵan kórsetilgen qurmet dep bilemin. Bir jaǵynan, elordadaǵy barlyq aqyn-jazýshynyń jaǵdaıy keremet deı almaımyn. Keıbir qalamgerdiń jumysy, keıbireýiniń úıi joq. Bul soǵan sál de bolsa demeý. Qandaı qoǵam bolsa da, rýhanııat ókilderine qoldaý qajet. Endi osy is-shara dástúrge aınalsa dep tileımin!», dedi Dáýletkereı Kápuly.
Sondaı-aq mádenı is-shara aıasynda qala ákimdiginiń Ortalyqtandyrylǵan kitaphanalar júıesi «Astana – beıbitshilik pen jasampazdyq mekeni» atty kitap kórmesin uıymdastyrdy.