Úkimet qaýlysymen Qazaqstannyń nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi jospary bekitildi. Qujat Memleket basshysy Q.Toqaevtyń 2022 jyldyń 1 qyrkúıeginde Qazaqstan halqyna joldaǵan «Ádiletti memleket. Birtutas el. Berekeli qoǵam» Joldaýynda berilgen tapsyrmalardy oryndaý aıasynda ázirlendi, dep habarlaıdy Egemen.kz Úkimettiń baspasóz qyzmetine silteme jasap.
Keshendi jospar nashaqorlyqpen jáne esirtki bıznesimen tıimdi kúresý úshin qajetti birinshi kezektegi sharalardy eskere otyryp, qazirgi nashaqorlyqqa qatysty ahýaldy taldaý negizinde ázirlendi. Ony daıyndaý barysynda psıhoaktıvti zattardyń jańa túrleriniń úlesi artýy, esirtkini óndirý, tasymaldaý jáne taratý ádisteriniń ózgerýi, belsendi túrde engizilip jatqan qazirgi álemdik esirtki saıasatynyń erekshelikteri eskerildi.
Elimizde sıntetıkalyq zattardy jasyryn óndirý jaǵdaılary jıi anyqtalyp jatyr. Apıyndy, onyń ishinde Aýǵanstannan «Soltústik baǵyt» dep atalatyn tranzıt arqyly tasymal, kannabıs tobynyń esirtki zattarynyń aınalymy, sondaı-aq «dárihana» nashaqorlyǵy ózekti problemalar bolyp otyr.
Qabyldanǵan Jospar atalǵan baǵyttar boıynsha sharalar keshenin júzege asyrýǵa múmkindik beredi. Nátıjesinde 2025 jylǵa qaraı esirtki tutynýshylardyń sanyn azaıtý, esirtkige táýeldilikten uzaq merzimdi remıssııasy bar kámeletke tolmaǵandar sanyn 15%-dan 20%-ǵa deıin arttyrý, sondaı-aq esirtki tutynýshylardy 26%-dan 30%-ǵa deıin medısınalyq-áleýmettik ońaltýmen qamtý josparlanǵan.
Qujat zańnamalyq jáne normatıvtik-quqyqtyq bazany jetildirýdi, zamanaýı esirtki bıznesiniń jańa syn-qaterleri men qaýip-qaterlerine qarsy turýdyń tıimdiligin arttyrýdy, halyqaralyq yntymaqtastyqty nyǵaıtý men keńeıtýdi, qazaqstandyq qoǵamda nashaqorlyq deńgeıin tómendetýdi kózdeıdi.
Nashaqorlyqtyń aldyn alý, emdeý, nashaqorlardy ońaltý júıelerin jetildirýge, sondaı-aq vedomstvoaralyq ózara is-qımyldy nyǵaıtýǵa basa nazar bólinedi.
Esirtkige jáne esirtki bıznesine qarsy is-qımyldy júzege asyratyn memlekettik organdardy materıaldyq-tehnıkalyq jaraqtandyrýdy jaqsartý boıynsha sharalar kesheni qarastyrylǵan. Bul jańa syn-qaterler men qaýipterdiń dereý aldyn alýǵa múmkindik beredi.
Emdeý-saýyqtyrý ortalyqtaryn jańǵyrtý jáne jańalaryn ashý jumystary júrgiziledi. Ushaq pen ushqyshsyz basqarylatyn apparattardy paıdalana otyryp, adam az júretin aýmaqtardaǵy jasyryn esirtki zerthanalary men plantasııalardy joıý sharalary qabyldandy.
Jospar shekaralyq ótkizý pýnktterin dárilik zattardy, prekýrsorlardy jáne dárihana zerthanalaryna arnalǵan jabdyqtardy anyqtaýǵa arnalǵan skrınıngtik quralmen qamtýdy kózdeıdi.
Budan bólek, jańa sıntetıkalyq preparattardy, sondaı-aq azamattardy medısınalyq kýálandyrý aıasynda alynatyn qan úlgileri men basqa da bıomaterıaldardy zertteýdi jedeldetý úshin sot saraptama organdarynyń materıaldyq-tehnıkalyq bazasy nyǵaıtylady.
Keshendi josparda atalǵan sharalardy júzege asyrý úshin bıýdjet esebinen 53,1 mlrd teńge bólý qarastyrylǵan.