Prezıdent Qasym-Jomart Toqaev Astananyń 25 jyldyq mereıtoıyna arnalǵan baýyrlas qalalar forýmynda Astananyń memleket órkendeýindegi rólin erekshe atap ótti, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy báseke deńgeıi joǵary jáne qubylmaly qazirgi álemde qalalardyń qarqyndy ári ornyqty damýy óte mańyzdy ekenin aıtty.
«Investısııalardy, ınnovasııalyq tehnologııalardy, eń bastysy, adamı kapıtaldy tarta otyryp, qalalar orasan zor kúsh shoǵyrlanatyn ortaǵa aınalady. Adamdar jáne olardyń shyǵarmashylyq qýaty, biregeı bilimi, kreatıvti ıdeıasy men otanshyldyq rýhy – ult jetistiginiń negizgi faktory. Sondyqtan qalalardy tıimdi basqarý jáne ýrbanıstıkadaǵy jańa úrdisterdi júıeli zerdeleý qajet. Bul másele bolashaqqa umtylǵan ár memleket úshin strategııalyq mańyzǵa ıe bola bastady», dedi Memleket basshysy.