Memleket basshysy Astana qalasynyń 25 jyldyq mereıtoıyna arnalǵan baýyrlas qalalar forýmynda jasandy ıntellekttiń damýy qalany basqarý úshin jańa múmkindikterge jol ashatynyn aıtty, dep habarlaıdy Egemen.kz Aqordanyń baspasóz qyzmetine silteme jasap.
«Ortalyq kóshelerdi ǵana jarqyratyp qoıyp, qalanyń shetkeri aýdandaryna kóńil bólmeý ádiletti qoǵam ıdeıasyna saı kelmeıdi. Úılesimdi ári teńgerimdi megapolıs úshin tıimdi kólik júıesiniń, sonyń ishinde damyǵan qoǵamdyq kóliktiń, yńǵaıly velosıped jáne jaıaý júrginshiler aýmaǵynyń bolýy asa mańyzdy. «Aqyldy qala» tujyrymdamasyn júzege asyrý azamattarǵa jańa sıfrlyq qyzmet usynýǵa, ǵımarattardyń energııa tutyný tıimdiligin aıtarlyqtaı jetildirýge, sondaı-aq kólik aǵynyn túbegeıli ońtaılandyryp, kóshedegi qaýipsizdikti arttyrýǵa múmkindik beredi. Bul – biz úshin ózekti mindet», dedi Memleket basshysy. Sonymen qatar Prezıdent adamdarǵa ózara tyǵyz baılanys ornatýǵa kómektesip, azamattar men bıznestiń qaladaǵy ózekti problemalardy kóterip, olardy sheshe alatyn belsendi qoǵamdastyq qurý isine atsalysýyna yqpal etetinin, Astana bul baǵytta damyp, birqatar jetistikke jetkenin atap ótti.