Elimizdiń ońtústik astanasynda Shanhaı yntymaqtastyq uıymyna múshe elderdiń Shekara qyzmeti men quzyretti organdary basshylarynyń 9-shy otyrysy ótti, dep habarlaıdy Egemen.kz.
Qazaqstan Respýblıkasy UQK Shekara qyzmeti uıymdastyrǵan mańyzdy kezdesýge Úndistan, Iran, Qytaı, Qyrǵyzstan, Pákistan, Reseı, Tájikstan jáne О́zbekstan shekaralyq qyzmetteriniń ókilderi, Belarýs jáne Mońǵolııa elderinen baqylaýshylar, sonymen qatar ShYU aımaqtyq terrorızmge qarsy qurylymy men TMD-ǵa qatysýshy memleketterdiń Shekara áskerleri qolbasshylarynyń keńesi qatysty.
QR UQK Tóraǵasynyń orynbasary – Shekara qyzmetiniń dırektory general-maıor E.Aldajumanov ShYU-na múshe elderdiń Shekara qyzmeti men quziretti organdary basshylarynyń 9-shy otyrysyna qatysýshylarynyń aldynda QR UQK Tóraǵasynyń quttyqtaýyn oqydy.
UQK Tóraǵasy óziniń quttyqtaýynda, kúni keshe ǵana Nıý-Delı qalasynda ótken Shanhaı yntymaqtastyq uıymyna múshe memleketter basshylary keńesiniń otyrysynda mańyzdy sheshimder qabyldanǵanyn aıta kelip, tóraǵalyq Úndistannan Qazaqstanǵa berilgenin, sonymen qatar, Iran ShYU-ǵa tolyqqandy múshe memleket mártebesin ıelengenin jetkizdi. «Búgingi forým Eýrazııanyń geografııalyq qıylysynda ǵana emes ShYU keńistigi bolyp tabylatyn Qazaqstan aýmaǵynda ótkiziledi. Qazaqstan Respýblıkasynyń Prezıdenti Qasym-Jomart Kemeluly Toqaev 2022 jyldyń qyrkúıeginde ótken Samarqand sammıtinde ShYU-nyń halyqaralyq bedeli joǵary ekenin, búginde tabysty ári kópjaqty uıymǵa aınalǵanyn basa aıtqan bolatyn. Jer shary halqynyń shamamen jartysyn qamtıtyn ShYU – kún tártibinde aýqymdy máselelerdi qarastyrady. Endeshe, 9-shy otyrystyń dástúrli dostyq pen senim atmosferasynda ótetinine senimdimin, al shekaralar bizdiń elderimiz ben halyqtardy ajyratpaıdy, biriktiredi!» delingen.
ShYU-nyń Shekara qyzmeti men quzyretti organdary basshylarynyń 9-shy otyrysynda qatysýshy-elderdiń memlekettik shekaralaryndaǵy jaǵdaılar boıynsha máseleler kóterildi. Shekara qyzmetiniń basshylary óz elderinde bolyp jatqan jaǵdaılarǵa toqtalyp, Terrorızm jáne ekstremızm, esirtki tasymaldary, zańsyz kóshi-qonǵa qarsy is-qımyldar týraly sharalar týraly baıandama jasady. Bul óz kezeginde qatysýshylardyń ShYU-ǵa múshe memleketterdiń memlekettik shekaralaryndaǵy jaǵdaıdy jáne onyń damý boljamdaryn baǵalaýǵa múmkindik berdi. Qazaqstan Respýblıkasynyń bastamasy boıynsha júrgizilgen «Dostyq shekarasy – 2022» birlesken shekaralyq operasııasynyń qorytyndysy shyǵaryldy. Osy merzimde 226 shekara buzýshy quryqtalyp, shekara rejımi men kóshi-qon zańnamasyn buzǵan 2 myńnan astam adam ustaldy. Zańsyz aınalymnan 68 dana qarý, 52 myń oq-dári, 590 keli túrli esirtki jáne quramynda esirtki bar zattar tárkilendi. Túrli zattar men taýarlardy, onyń ishinde 456 keli baǵaly buıym, jarııalanbaǵan 1 mıllıonnan astam AQSh dollary, shekaradan ótkizýge qatań tyıym salynǵan ádebıetterdi jáne dinı taýarlardyń baspa ónimderin kontrabandalyq jolmen tasymaldaýdyń 113 dereginiń aldyn aldy.
Otyrys sońynda ShYU-ǵa múshe memleketterdiń quzyretti organdary jáne shekara qyzmetteri sarapshylarynyń 2024 jylǵa arnalǵan jumys jospary qaralyp, qazirgi tańdaǵy terrorızmmen, qarý jáne esirtki kontrabandasymen, zańsyz kóshi-qonǵa baılanysty jáne ózge de qaterler men qaýipterge qarsy is-qımyl boıynsha sharalardy qamtıtyn birqatar mańyzdy qujattarǵa qol qoıyldy.