Búgin Shymkent qalasynda nysana kózdeýden Qazaqstan Respýblıkasynyń VI jazǵy Spartakıadasy aıaqtaldy. Bul týraly Mádenıet jáne sport mınıstrligine qarasty Sportty damytý dıreksııasynyń baspasóz qyzmeti habarlady, dep jazady Egemen.kz.
Bir aptaǵa sozylǵan baıraqty básekede 27 baǵdarlamada júlde sarapqa salyndy. Onyń 12-si jekeleı, 12-si komandalyq saıysta, qalǵan 3 medal jıyntyǵy aralas juptar arasynda óz ıesin tapty. Barlyǵy Shymkenttegi básekege 9 óńirden 138 sportshy jınaldy.
Búgingi 2 júlde jalpy eseptegi jeńimpazdy anyqtap berdi. Jyljymaly nysana kózdeý men 10 metrden pnevmatıkalyq tapanshamen aralas juptyq synda Almaty qalasy chempıon atanyp, jalpy esepte 1-oryn aldy. Olardyń enshisinde 13 altyn, 16 kúmis pen 5 qola medal bar. Al Shymkent qalasy (13 altyn, 6 kúmis, 8 qola) 2-shi bolsa, úzdik úshtikti Jambyl oblysy 1 altyn, 4 qolamen túıindedi.
«Osy Spartakıada barysyndaǵy eń qıyn fınal búgin boldy. Irikteýde 586 upaı jınadym. Bul meniń úzdik kórsetkishim deı almaımyn. Budan kóp ball jınaǵan kezder bar. Fınal men úshin sátsiz bastaldy. Biraq ortasyna qaraı bar sheberligimdi kórsete bastadym. Qarsylastarymnyń aldyn orap jeńiske jetkenime qýanyshtymyn. Osy sát úshin biz uzaq daıyndalamyz. Endi sheteldegi jarystardan júldeli oralýǵa barymdy salamyn», dedi Ulttyq qurama sportshysy Islam Satpaev.
Osymen Olımpıada baǵdarlamasyna kiretin 25 sport túrinen VI jazǵy Spartakıada máresine jetti. Nysana kózdeýden soń 20 óńirdiń ishinde jalpy esepte anaý aıtqandaı ózgeris bolǵan joq. Qazir Almaty qalasy kósh bastap kele jatyr. Al odan keıingi satyda Shymkent qalasy tursa, Qaraǵandy oblysy 3-satyny Astana qalasyna bermeı, ózinde saqtap qaldy.
«Bul jarysta bar múmkindigimniń 60 paıyzyn kórsettim dep oılaımyn. Nátıjeme kóńilim tolady. Búgin 5-shi júldemdi jeńip aldym. Kelesi jarysqa deıin daıyndalýǵa kóp ýaqyt joq. Alda jastar arasyndaǵy álem chempıonaty kele jatyr. Sosyn, Azııa oıyndarynda jaqsy nátıje kórsetýimiz kerek», dedi Almaty qalasynyń sportshysy Aleksandra Sadýakasova.
Eske sala ketsek, 4 jyl buryn nysana kózdeýden V jazǵy Spartakıada osy Shymkent qalasynda ótip, jarys qojaıyndary top jarǵan. Al jalpy esepte 2-oryndy Almaty qalasy alǵan.