Jelezın aýdanyndaǵy «Asan» sharýa qojalyǵy aıdyń-kúnniń amanynda 37 bas qara malynan aıyrylyp qaldy. Byltyr nesıege satyp alǵan asyl tuqymdy qymbat túlik aınalasy bir saǵattyń ishinde birinen soń biri sulap, aram qatqan. Sharýa ıesi de, veterınarlar da sıyrlardyń neden ólgenin bile almaı otyr.
«Asan» sharýa qojalyǵy Bashmachnoe aýylynda ornalasqan. Jaısyz oqıǵa 14 shilde kúni bolypty. Qojalyq ıesi Talǵat Shotbaqovtyń aıtýyna qaraǵanda, shyǵyn bolǵan maldyń barlyǵy – sıyrlar. О́riste jaıylyp júrgen asyl túlik bir-bir jarym saǵat ishinde kezegimen qulap, jatqan jerinen turmaı qalǵan. «Teńkıip-teńkıip jatqan janýarlarǵa qaraýdyń ózi qorqynyshty edi. Tuqymy – aberdın angýs. Byltyr «Demeý» nesıe seriktestiginen on jylǵa 30 mln teńge nesıe alyp, 86 bas mal satyp alǵan edik. Bıyl malymyz jaqsy tóldep, memlekettiń sýbsıdııasyna iligemiz, qaryzymyzdy jeńildetemiz dep qýanyp otyr edik. Oıda joq jerden osyndaı kesapatqa jolyǵyp otyrmyz. Sharýashylyqtaǵy 120 bas qara maldyń 37-si óldi. Kúnkóris malymyzdyń úshten biri bulaısha aıaq astynan qyrylyp qalǵanyn túsine almaı, dal bolyp otyrmyz. Qazirgi jaǵdaıda bizge memleket kómektespese, jaǵdaıymyz qıynǵa túsedi. О́lgen sıyrlardyń buzaýyn baǵyp-qaǵýdyń ózi úlken shyǵyn. Jalpy, sharýashylyqty ustap turýdy, qaramaǵymdaǵy 3 jumyskerime qalaı eńbekaqy tóleýdi bilmeı otyrmyn», deıdi saly sýǵa ketken sharýa ıesi.
О́ńirlik veterınarııa basqarmasy basshysynyń orynbasary Asyltas Tileýbaev atalǵan eldi mekende 37 bas maldyń belgisiz aýrýdan qyrylǵanyn rastady. Mal dárigerleri sharýashylyqtan habar túsisimen oqıǵa ornyna baryp, mal ólekselerinen arnaıy jaqpalar alyp, klınıkalyq jaǵdaılaryn jiti zerttegen.
«Janýarlardyń klınıkalyq jaǵdaılaryn zerdeleı kele, olardyń asa qaýipti aýrýdan ólmegenine kóz jetkizdik. Eger juqpaly ári aýyr mal dertinen qyrylsa, ádette silekeıi shubyryp, ezýinen qan ketip óledi. Bul jerde veterınarlar eki nusqany usynyp otyr. Birinshisi, jaıylymdarda kezdesetin túrli ýly shóp pen sańyraýqulaq. Jańbyrdan soń ýly ósimdikterdiń qaýlap shyǵatyny málim. Ekinshi nusqa – egistik jerlerde qoldanylatyn pestısıdterdiń áseri. Eldi mekenniń mańaıynda egin, kartop egiledi. Pestısıdterdiń áseri egis tanaptarynan 3 metrge deıin jaıylýy múmkin. Mal sol jerlerdegi shópti jep qyrylýy da múmkin. Mamandarymyz mal órisi men egis tanaptarynan, sýattardan, ólekselerden arnaıy analızder aldy. Onyń nátıjeleri 15 kún ishinde belgili bolady. Sodan soń ǵana bul keleńsiz jaǵdaıdyń sebebin aıta alamyz», deıdi Asyltas Abylaıuly.
Qazirgi kúni ólgen janýardyń barlyǵy arnaıy peshte órtelgen. Bul – yqtımal ınfeksııalyq aýrýdyń aldyn alý qadamy dep túsindirdi jaýapty basqarma ókilderi. Sharýashylyqtaǵy taǵy 4 mal áli de aýyryp turǵany baıqalady, sonyń ishinde bireýiniń jaǵdaıy nashar. Mal dárigerleri arnaıy em-domdaryn jalǵastyryp jatyr.