Prezıdent️ Qasym-Jomart Toqaev Saýd Arabııasynda ótip jatqan «Ortalyq Azııa + Shyǵanaqtaǵy arab memleketteriniń yntymaqtastyq keńesi» birinshi sammıtinde aımaqaralyq týrızmdi damytý máselesi nazardan tys qalmaýy kerek ekenin aıtty, dep habarlaıdy Egemen.kz.
«Ortalyq Azııada paıdalaný qajet biregeı týrıstik resýrstar bar. Týrızm ındýstrııasy - aımaq ekonomıkasynyń qarqyndy damyp kele jatqan salalarynyń biri. Osyǵan baılanysty biz týrıstik ónimdi mádenı-tanymdyq, ekologııalyq, sporttyq, saýyqtyrý jáne iskerlik salalarda ózara ilgeriletýdi damytýǵa daıynbyz», dedi Prezıdent.
Qasym-Jomart Kemeluly aıtyp ótkendeı, búginde Qazaqstan arab memleketteriniń Yntymaqtastyq Keńesiniń barlyq elderi úshin vızasyz rejım engizdi.
«Búgingi tańda Qazaqstan arab memleketteriniń Yntymaqtastyq Keńesiniń barlyq elderi úshin vızasyz rejımdi engizdi, elderdiń astanalarymen de tikeleı áýe qatynasyn jolǵa qoıdyq.
Men alǵa qoıǵan bastamalar Qazaqstannyń ózara ornyqty ósý men órkendeýdi qamtamasyz etý múddesinde bizdiń yntymaqtastyǵymyzdy nyǵaıtýǵa degen umtylysyn rastaıtynyn atap ótkim keledi», dep túıindedi Memleket basshysy.