Tennısten álemniń úshinshi, elimizdiń birinshi raketasy Elena Rybakına 2023 jyldyń alǵashqy jarty jylynyń qorytyndysy boıynsha eıs jasaý kórsetkishi boıynsha birinshi orynda tur.
Bıylǵy maýsym Elena úshin asa tabysty ótip jatyr deýge bolady. Jyl basynda ol Melbýrnde ótken Aýstralııa ashyq birinshiliginiń fınalyna deıin alqynbaı jetse, naýryz aıynda Indıan-Ýellstegi asa iri halyqaralyq týrnırde top jardy. Odan keıin ol Maıamıdegi taǵy bir asa iri dodanyń fınalynda baq synady. Al jýyrda ǵana Londonda ótken «Úlken dýlyǵa» sanatyndaǵy jarystyń shırek fınalyna deıin jetti. Bul – tennıs álemindegi eń úzdik kórsetkishterdiń biri sanalady.
Sonymen qatar Rybakınanyń budan bólek te aýyz toltyryp aıtarlyqtaı jetistikteri bar. Máselen, ol bıyl 44 matchta kortqa shyǵyp, 349 márte eıs jasaǵan eken. Iаǵnı bul da bıylǵy tennıs tarıhyndaǵy eń úzdik kórsetkish retinde tirkelip otyr. Eıs jasaý boıynsha reıtıngte ekinshi orynǵa fransııalyq Karolına Garsııa (305), úshinshi satyǵa Belarýs ókili Arına Sobolenko (275) jaıǵasqan.