Bul týraly Aqparat jáne qoǵamdyq damý mınıstri Darhan Qydyráli Qapshaǵaıda ótip jatqan I Halyqaralyq medıa jáne týrızm forýmynda málimdedi, dep habarlaıdy Egemen.kz.
«Qazir álemdik medıada post-shyndyq kezeńi, jasandy ıntellekt dáýiri bastalǵany bárimizge belgili. Prezıdent Qasym-Jomart Toqaev elimiz aqparat salasynyń jańa dáýir talaptaryna saı, jańa sapaǵa ótýi keregin atap ótken. TMD elderi arasynda birinshi ret qabyldanǵan «Onlaın platformalar jáne onlaın jarnama týraly» zań osy qajettilikti rettep, olqylyqtyń ornyn toltyrady», dedi mınıstr.
Sonymen qatar Darhan Qydyráli Qazaqstandaǵy kreatıvti ındýstrııany damytý úshin birqatar naqty jumystar atqarylyp jatqanyn atap ótti.
«Qyrkúıek aıynda biz Astana Media Week, New Media forýmy jáne «Úrker» televızııalyq syılyǵyn biriktirip ótkizýdi josparlap otyrmyz. Bıyl «Úrker» syılyǵynda «Úzdik YouTube arnasy» jáne «Úzdik podkast» syndy eki jańa atalym qosyp otyrmyz. Bul salanyń damýyna serpin berip, túrki álemin jaqyndastyra túsedi dep sanaımyz», dedi mınıstr.
Aıta keteıik, aldaǵy Astana Media Week, New Media forýmdary, sondaı-aq «Úrker-2023» baspa, radıo, ınternet jýrnalıstıka salasyndaǵy ulttyq syılyǵy kúzde Astana qalasynda ótedi.