Tyıym salynǵan jerlerde shomylǵan eki adam menıngıtke shaldyqqan

Brıfıng barysynda Astanada sýǵa túsý maýsymy bastalǵaly belgisiz jerlerde shomylǵannan keıin serozdy menıngıt juqtyrýdyń eki jaǵdaıy anyqtalǵany belgili boldy. Sarhat Beısenovanyń aıtýynsha, sýburqaqtar men sýǵa túsýge arnalmaǵan oryndarda shomylý kezinde adam enterovırýs ınfeksııasyn juqtyrýy múmkin. «Shomylý maýsymy bastalǵaly beri enterovırýsty ınfeksııamen syrqattanýshylyq ósti. Byltyrǵy statıstıkamen salystyrǵanda aýrýshańdyq 19%-ǵa artyp, 100 myń halyqqa shaqqandaǵy kórsetkish 2022 jylǵy 43,1-ge qarsy 53,2 boldy. Bul ınfeksııaǵa 4 jasqa deıingi balalar kóbirek beıim bolatynyn da eskerý qajet», dedi Sarhat Beısenova.

Elordanyń bas sanıtar dárigeri enterovırýstyń jyly sýdyń betinde kóbeıetinin qosa aıtty.

«Jaz mezgilinde tek ruqsat etilgen oryndar men basseınderde sýǵa shomylýǵa bolatynyn, basqa eshbir jaǵdaıda sýburqaqtarǵa túsýge bolmaıtynyn únemi qaıtalap aıtamyz. Birqatar vırýstyq ınfeksııalar, ásirese enterovırýstar ashyq sý aıdyndary men sýburqaqtarda tez kóbeıedi. Belgilenbegen jerlerde shomylý kezinde bul vırýsty juqtyrý qaýpi óte joǵary. Sonymen qatar basqa da vırýstyq ınfeksııalar, atıt A sııaqty ınfeksııalardy juqtyrý qaýpi bar», dep túıindedi spıker.