Ulttyq mýzeıdiń qorynda bizge beımálim jádigerler kóp. Tarıh kómbesinen syr shertetin túrli buıymdar ár ǵasyrdaǵy mádenıetke jatady. Máselen, sonyń biri – bastary ońǵa-solǵa burylǵan jarty jylqy tárizdes altynnan quıylǵan plastınalar. Ol Esik qorǵanynan tabylǵan. Bizdiń dáýirimizge deıingi V-VI ǵasyrlarǵa jatady.
Jylqy jartylaı beınelengen jup qapsyrma – adam baskıiminiń bólshekteri. Uzyndyǵy – 6,5 sm, eni – 5,2 sm. Tigýge arnalǵan sańylaýlar jylqynyń denesi men aıaǵynda ornalasqan. Bekitpe sańylaýlardy bulaı ornalastyrý qapsyrmany qadaǵannan keıin jylqylar beınesi kólemdirek kóriný úshin jasalsa kerek. Munda jylqylardyń basy men jaly erekshe kórinedi. Janýarlardyń deneleri nobaı naqyshynda jasalǵan. Kekili mańdaıyna túsken jáne jaly tógilgen jylqy beınesi Azııa aımaǵynda kezdesedi. Qapsyrmalar qalyptaý arqyly jasalǵan, betki jaǵyndaǵy bólshekteri oıýmen naqyshtalǵan. Tutas alǵanda, qos músinniń kelbeti uqsas jáne birtutas sımmetrııaly kompozısııany quraıdy. Bul rette olardyń árqaısynyń ózindik aıyrym ereksheligi bar. Qazirgi ýaqytta qalpyna keltirilgen músinderdiń bireýiniń aıaǵy synǵan.