QR Premer-mınıstriniń birinshi orynbasary jumys saparymen Kókshetaý qalasyna baryp, birqatar kásiporyndardyń jumysymen tanysty, dep habarlaıdy Egemen.kz Aqmola oblysy ákimdiginiń baspasóz qyzmetine silteme jasap.
Roman Sklıar oblys ákimi Ermek Marjyqpaevpen birge «Kókshetaý Jylý» ShJQ MKK aldaǵy jylytý maýsymyna daıyndyqtyń barysymen tanysty.
Qalany jylýmen jabdyqtaýdy AQ-1 jáne AQ-2 qazandyqtary júzege asyrady.
Aıta ketsek, QR Úkimetiniń rezervinen bólingen shamamen 2,6 mlrd teńge qarajat esebinen AQ-1 jáne AQ-2 tútin qubyrlaryn, №7 sý jylytý qazandyǵyn jáne № 8,9,10 qazandyq agregattaryn jóndeý jumystary júrgizilip jatyr. Qazirgi ýaqytta jóndeý jumystaryn jalpy oryndaý 50%-dan asady.
Sonymen qatar uzyndyǵy 3,3 km jylý toraptaryn aýystyrý, uzyndyǵy 3,7 km jylý oqshaýlaýyn qalpyna keltirý jáne jóndeý jumystary júrgizilýde. 1775 m jylý toraptary men 2 620 m jylý toraptarynyń oqshaýlaýyn jóndeý júrgizildi. Sondaı-aq 3 sorǵyny aýystyrýǵa shart jasaldy.
«Jylý berý maýsymynyń bastalýyna qaraı barlyq jumystar aıaqtalýy tıis. Tıisti qarajat bólindi, jumys isteńizder. Qyrkúıektiń ortasynda Bestóbe k. jáne Stepnogorsk q. barýdy, qalanyń jylýmen jabdyqtaý obektileriniń jáne JEO jylý berý maýsymyna daıyndyǵyn tekserýdi josparlap otyrmyn», dep atap ótti Roman Sklıar.
Aralaý barysynda Premer-mınıstrdiń birinshi orynbasary men óńir basshysy sý tazartý qondyrǵylaryna da bardy. Memleket basshysynyń tapsyrmasyn oryndaý úshin «Kókshetaý qalasynyń sý qubyryn tazartý ǵımarattaryn rekonstrýksııalaý jáne keńeıtý» jobasy iske asyrylyp jatyr. Bıyl atalmysh joba túzetýden ótti, endi ony iske asyrý maqsatynda oblystyq bıýdjetten 1,5 mlrd teńge bólindi. Búgingi tańda merdiger uıymmen qurylys-montaj jumystary, qurylys jáne shyǵys materıaldaryn satyp alý júrgizilýde.
Sondaı-aq sapar barysynda Roman Sklıar men Ermek Marjyqpaev Saryarqa shaǵyn aýdany qurylysynyń barysymen tanysty.
Qurylys 2012 jyly bastalǵan edi. Shaǵyn aýdannyń aýmaǵy 1120 ga quraıdy, egjeı-tegjeıli josparlaý jobalarymen 900 gektardan astam jer ıgerildi.
900 oryndyq Ál-Farabı atyndaǵy IT-mektep, órt sóndirý deposy, «Vıamedıs» klınıkalyq-ońaltý ortalyǵy, muz arenasy, 58 kóp páterli turǵyn úı sııaqty birqatar áleýmettik mańyzy bar obektiler paıdalanýǵa berildi.
280 oryndyq 2 balabaqsha, 1200 oryndyq mekteptiń, 150 oryndyq múgedekterge arnalǵan ońaltý ortalyǵynyń qurylysy boıynsha jumystar júrgizilip jatyr. Sondaı-aq 1500 oryndyq 2 jaıly mektep, polısııa departamenti ǵımarattarynyń qurylysy úshin jer ýchaskeleri bólindi.
Qalada 630 orynǵa eseptelgen kópbeıindi oblystyq aýrýhana salý josparlanyp otyr. 3 jalǵa beriletin jáne 4 kredıttik úıdi paıdalanýǵa berý josparlanýda.
Odan keıin Bestóbe aýyly turǵyndarynyń bastamashyl tobymen kezdesý ótti. Kent turǵyndary jumysqa ornalasýǵa jáne kenishiniń aldaǵy ýaqyttaǵy jaǵdaıyna qatysty máselelerdi kóterdi.
«Qazaqaltyn» JShS kásipornynyń jumyskerlerine qalanyń ónerkásip kásiporyndarynda bos jumys oryndary jáne belsendi jumyspen qamtý sharalary, sondaı-aq 6 aıǵa deıin jumysynan aıyrylý boıynsha áleýmettik tólemder usynyldy.
Premer-mınıstrdiń birinshi orynbasary bul másele Úkimettiń baqylaýyna alynǵany týraly aıtty.
«Biz zań aıasynda jáne halyq múddesi úshin áreket etemiz. Tamyz aıynda sorǵylar men qubyrlar ornatylǵan soń Bestóbe kenishinde sý sorý jumysy bastalady», dedi Roman Sklıar.
Qalpyna keltirý jumysynyń alǵashqy kezeńderinde 320 astam adam tartyldy. Bestóbe kenishi tıisili «Altynalmas» AK» AQ kompanııasynyń aqparaty boıynsha, sýdyń aǵyzylýyna jáne jańa taý gorızontyna qoljetimdilik baıqalýyna qaraı jergilikti halyq arasynan shamamen 300 shahter qosymsha tartylady. Jalaqynyń tolyq tólenýimen kásiporyndy qalpyna keltirý úshin jumyskerlerdiń qajetti sany jumysqa tartylatyn bolady. Qalǵan tartylmaǵan jumyskerlerge «Altynalmas» AK» AQ jáne «Qazaqmys» korporasııasynyń basqa óndiristik alańdarynda jumysqa ornalasý nusqalary usynylady.