«QazTransGaz Aımaq» AQ taǵy eki aýyldy tabıǵı gazǵa qosty, dep habarlaıdy Egemen.kz Energetıka mınıstrliginiń baspasóz qyzmetine silteme jasap.
Túrkistan oblystyq energetıka jáne TÚKSh basqarmasy basshysynyń orynbasary Roza Sarıeva, Keles aýdanynyń ákimi Jánibek Aǵybaev, BAQ ókilderi men aýyl turǵyndary qatysqan gaz jetkizý saltanatynda «QazTransGaz Aımaq» AQ Bas dırektory Baýyrjan Asqarov gaz mamandarynyń basty mindeti – ár shańyraqqa jylý men qýanysh syılaý ekenin atap ótti.
«QazaqGaz» ulttyq kompanııasynyń enshiles kásiporny – «QazTransGaz Aımaq» AQ Túrkistan oblysyndaǵy Keles aýdanynyń Báıterek jáne Jambyl-2 eldi mekenderin tabıǵı gazǵa qosty.
Tabıǵı gazdy bul aýyldarǵa jetkizý úshin Ǵanı Muratbaev atyndaǵy gaz taratý stansııasynan (GTS) 25 shaqyrymnan asa gaz qubyry tóseldi, sonyń arqasynda 544 turǵyn úıdi tabıǵı gazǵa qosý múmkindigi týdy.
Gaz mamandary tutynýshylarǵa qaýipsizdik sharalaryn saqtaý jáne gazdy únemdi paıdalaný erejeleri jazylǵan eskertý paraqshalaryn taratty.