Jumysshy ómiriniń basty kepili – eńbek qaýipsizdigin saqtaý. Alaıda jumys berýshiniń bári buǵan kóńil aýdarmaıdy. Sol sebepten quqyǵy buzylǵandyqtan, eńbek ınspeksııasyna júginetinder az emes.
Atyraý oblystyq memlekettik eńbek ınspeksııasy basqarmasy basshysynyń orynbasary Dýman Ábeýovtiń málimetine súıensek, bıylǵy 6 aıda jumysshylardan 1 075 ótinish túsken. Memlekettik eńbek ınspektorlarymen 912 ótinishti qarap, 583 adamnyń eńbek qatynastaryna baılanysty quqyǵyn qorǵaǵan.
«Basqarmanyń memlekettik ınspektorlary eńbek zańnamasynyń saqtalýyna memlekettik baqylaýdy, qyzmetkerlerdiń quqyqtary men bostandyqtarynyń saqtalýyn jáne qorǵalýyn qamtamasyz etedi. О́ıtkeni bizdiń mindetimiz – jumysshylardyń quqyqtaryn qorǵaý arqyly eńbek daýlaryn retteý, jumysshylar men jumys berýshi arasyndaǵy janjaldyń aldyn alyp, kelispeýshilikterdi beıbit jolmen sheshýge yqpal etý. Kásiporyndarda eńbek zańnamasynyń saqtalýyn qadaǵalap, anyqtalǵan buzýshylyqtardy joıý jóninde sharalar qabyldaıdy. Jalaqynyń ýaqytyly ári tolyq tólenýine, eńbek shartyna sáıkes jumys pen demalys ýaqytynyń, eńbek qaýipsizdiginiń saqtalýyna tekserý júrgizedi», deıdi D.Ábeýov.
Eńbek ınspektorlary bıylǵy 6 aıda basqarmaǵa tirkelgen shaǵymdar men profılaktıkalyq baqylaý negizinde 124 ret tekserý júrgizgen. Tekserý qorytyndysymen eńbek zańnamasyn buzýdyń 162 deregi anyqtalyp otyr. Al zańsyzdyqtardy joıý úshin 66 uıǵarym engizildi. Eńbek zańnamasynyń talaptaryn saqtamaǵan 9 bilim berý, 3 densaýlyq saqtaý mekemesine, 28 iri kásiporynǵa 57 ákimshilik hattama toltyrylyp, 7,7 mln teńge aıyppul salyndy. Osy kezge deıin aıyppuldyń 5,7 mln teńgesi óndirildi.
«Bıyl munaı-gaz ónerkásibi men qurylys ındýstrııasy, temirjol jáne elektr qýatymen qamtý salasynda 38 óndiristik jazataıym oqıǵa tirkeldi. Sonyń saldarynan 16 jumysshy aýyr dene jaraqatyn alyp, 3 adam qaıtys boldy. Osy kezeńde tirkelgen jazataıym oqıǵalardyń sebebine taldaý júrgizildi. Taldaýǵa sáıkes 7 oqıǵa jumys berýshiniń kinásinen bolǵany anyqtaldy. Úsh oqıǵaǵa baılanysty jumys berýshiniń kinási 60-70 paıyzdy quraıdy. Bes oqıǵaǵa jumys berýshi de, jumysshy da kináli bolyp otyr. Demek eki taraptyń úlesi – 50 de 50%. Jumysshylardyń ózderi de jazataıym oqıǵaǵa sebepker bolady. Máselen, 2 óndiristik jaraqat jumysshynyń (30-40%) kinásinen ekeni tirkelip otyr. Bir jazataıym oqıǵaǵa jumysshy tolyq kináli bolyp shyqty», deıdi D.Ábeýov.
Degenmen jumys berýshi tarapynan jalaqyny mezgilinde tólemeı, jumysshylardy zaryqtyratyn jaıt tyıylar emes. Basqarmanyń memlekettik eńbek ınspektorlary eki mekemeniń 46 jumysshyǵa 8,7 mln teńge jalaqy bereshegi anyqtady. Osyǵan baılanysty qajetti shara qabyldanyp, jalaqy bereshegi tolyq óteldi. Al jalaqyny keshiktirgen laýazymdy tulǵalar ákimshilik jaýapkershilikke tartyldy.
Atyraý oblysynyń prokýrory Baýyrjan Jumaqanovtyń málimetinshe, bıylǵy 6 aıda 58 myńnan asa adamnyń quqyǵy qorǵalǵan. Onyń ishinde 18 myń bala, 4,2 myń kásipker bar.
«Prokýratýra qyzmetkerleriniń ustanatyn basym baǵyty – Memleket basshysynyń tapsyrmasyna oraı azamattardyń quqyǵyn qorǵaý. Osy oraıda prokýrorlardyń azamattardy jeke qabyldaý tıimdiligi artyp otyr. О́tken jyldyń 6 aıymen salystyrǵanda, jyl basynan beri jeke qabyldaýǵa jazylǵan adamdardyń sany 4,5%-ǵa ósti. Prokýrorlyq den qoıý sharalarymen memleketke 489 mln teńge zalal ótelip, 6,1 mlrd teńgeniń múlki qaıtaryldy. Prokýratýra organdarynyń úılestirýimen 180 jumysshyǵa 32 mln teńgeniń jalaqy bereshegi óteldi», dep málimdedi B.Jumaqanov.