Osy jyly áskerge shaqyrylǵan sarbazdardyń alǵashqy legi jaqynda ǵana áskerı ant qabyldap, elorda aýdandarynda qyzmetin bastady. Olar quqyq qorǵaý organdarynyń qyzmetkerlerimen birlesip, Astana qalasynyń turǵyndary men qonaqtaryn quqyqqa qaıshy jáne ózge de qylmystyq áreketterden qorǵaı otyryp, qoǵamdyq tártipti qamtamasyz etpek.
Kún saıyn elordalyq jedel brıgadanyń myńnan astam áskerı qyzmetshisi – ofıserler, serjanttar men sarbazdar 2 aýysymda elordanyń 5 ákimshilik aýdanynda qyzmetke kirisedi. Jaýyngerlik qyzmettiń birinshi kúni bólim komandıriniń birinshi orynbasary – shtab bastyǵy, polkovnık Erjan Ábdiqalyqov jas sarbazdardyń qyzmetine tabys tiledi.
Sondaı-aq áskerı qyzmetshilerdi Astana qalasy jergilikti polısııa basqarmasy bastyǵynyń mindetin atqarýshy, polısııa polkovnıgi Erjan Ádilbekov jáne 5573 áskerı bóliminiń ardagerler keńesiniń tóraǵasy, zapastaǵy podpolkovnık Abaı Dısenbekov quttyqtady.
Polkovnık Erjan Ábdiqalyqov jaýyngerlik qyzmet kezinde brıgadanyń áskerı qyzmetshileri únemi qylmys faktilerin ashyp, qylmyskerlerdi ustaıtynyn, urlanǵan zattar men esirtkilerdi tapqanyn atap ótti. Olar sondaı-aq azamattarǵa joǵalǵan balalardy nemese basqa týystaryn tabýǵa jıi kómektesedi.
2023 jyldyń birinshi jartyjyldyǵynda elordalyq brıgadanyń áskerı qyzmetshileri 3 myńnan astam quqyq buzýshyny ustady jáne polısııaǵa tapsyrdy. Osy ýaqyt ishinde olar 80 ret qyraǵylyqtyń jarqyn úlgisin kórsetti, 37 azamatty ustaýǵa kómektesti jáne 2 800-ge jýyq ákimshilik quqyq buzýshylyqtardyń jolyn kesti.
Aıta keteıik, jýyrda ǵana Ulttyq ulan sarbazy sýǵa batyp bara jatqan sportshyny qutqarǵan bolatyn. 21 shildede elordadaǵy «Stýdenttik saıabaqta» qoǵamdyq tynyshtyqty baqylap júrgen Ulttyq ulanǵa qarasty 5573 áskerı bóliminiń áskerı jasaǵy ózen jaǵasynan ótip bara jatyp, sýǵa tunshyǵyp, kómekke shaqyrǵan balany baıqaǵan.
Áskerı jasaq bastyǵy, qatardaǵy jaýynger Álibek Noǵaev bul týraly radıostansa kómegimen patrýldik toptyń bastyǵy qatardaǵy jaýynger Ahat Mataevqa dereý baıandaı salysymen kıimin sheship, sýyq sýǵa sekirgen.
Belgili bolǵandaı, 12 jasar bala eskek esý boıynsha jattyǵý kezinde jel ekpininen kanoesi aýdarylyp, sýǵa bata bastaǵan. Osylaısha, qyraǵy jaýyngerlerdiń batyl jáne der kezindegi áreketteri ony ajaldan aman alyp qaldy. Bala sporttyq jattyqtyrýshysyna tabystaldy. Olar quqyqtyq tártip qorǵaýshylaryna alǵystaryn aıtty.
Qatardaǵy jaýynger Álibek Noǵaev pen atalǵan áskerı jasaqtyń barlyq quramy elordalyq jedel brıgada komandıriniń alǵysyna bólendi.