Qaraǵandy oblysynda balalardyń jappaı ýlanýyna ınfeksııalyq aýrýlar sebep bolǵan joq. Bul týraly Úkimet otyrysynda Densaýlyq saqtaý mınıstri Ajar Ǵınııat aıtty, dep habarlaıdy Egemen.kz.
«Qaraǵandy oblysynyń Arnaýly áleýmettik qyzmet kórsetý ortalyǵynan aýrýhanaǵa túsken 14 balanyń jeteýi saýyǵyp, aýrýhanadan shyǵaryldy. Qazirgi tańda olar sol ortalyqtaǵy dárigerlerdiń baqylaýynda. Alty bala reanımasııa bólimshesinde jatyr, tórt balanyń jaǵdaıy oń dınamıkamen aýyr jaǵdaıda qalyp otyr. Eki balanyń jaǵdaıy óte aýyr kúıde. Jaǵdaıdyń aýyrlyǵy nevrologııalyq jáne ıntoksıkasııalyq sındromyna, tynys alý jetkiliksizdigine baılanysty bolyp otyr», dedi A. Ǵınııat.
Sondaı-aq Densaýlyq saqtaý mınıstri osy oqıǵa boıynsha respýblıkalyq jáne oblystyq deńgeıdegi mamandardyń keńeıtilgen konsılıýmdary kún saıyn uıymdastyrylyp jatqanyn atap ótti.
«Mınıstrlik zardap shekken balalardyń jaǵdaıyna monıtorıng júrgizýdi jáne medısınalyq kómek kórsetýdi jalǵastyryp jatyr. Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti epıdemııaǵa qarsy jáne tekserý is-sharalaryn jalǵastyryp otyr. Aldyn ala epıdemılogııalyq tekserý, zerthanalyq zertteý nátıjeleri aýrýdyń taralý sıpaty tamaqtan ýlanýdan bolmaǵanyn, sondaı-aq ınfeksııalyq aýrýlardyń joqtyǵyn kórsetti. Bul jaǵdaıdyń sebebine toqtalsaq, dárigerler balalar toksındi zattan qatty ýlandy dep paıymdaıdy. Qazir sot-medısınalyq saraptama júrip jatyr. Balalardyń jaǵdaıy mınıstrliktiń erekshe baqylaýynda», dedi mınıstr.