Densaýlyq saqtaý vıse-mınıstri – Bas memlekettik sanıtarlyq dáriger Aıjan Esmaǵambetova balalarǵa arnalǵan jazǵy lagerlerdi jospardan tys tekserý barysy men alǵashqy nátıjeler jaıly aqparat berdi, dep habarlaıdy Egemen.kz.
Aıjan Esmaǵambetovanyń aıtýynsha, árbir lager óz qyzmetin bastamas buryn sanıtarlyq epıdemııalyq qorytyndy alýy tıis. Bıyl Sanıtarlyq-epıdemıologııalyq baqylaý komıtetiniń aýmaqtyq departamentterine 200-ge jýyq ótinish kelip tústi. 170 ótinishke qorytyndy berildi, 30-y sanıtarlyq erejelerge sáıkes kelmegen.
«Sanıtarlyq-epıdemıologııalyq qorytyndyny berý kezinde ruqsat berý baqylaýy júrgiziledi. Osy kezeńde biz obektilerdiń standarttar men talaptarǵa sáıkestigin tekseremiz: jıhazdyń, sýmen jabdyqtaýdyń, kárizdiń bolýy. Biraq bul kezde obekt jumys istemeıtindikten, onyń qyzmetin, tamaqtyń, medısınalyq kómektiń sapasyn tekserý múmkin emes», dedi Aıjan Esmaǵambetova.
Sońǵy ýaqytta áleýmettik jelide jazǵy lagerlerdiń qyzmeti týraly jaǵymsyz aqparat kóbeıdi. Bas memlekettik sanıtarlyq dárigerdiń aıtýynsha, Bas prokýratýra barlyq jazǵy balalar lagerlerge tekserý jumystaryn júrgize bastady.
«Bizdiń aýmaqtyq departamentter bul tekseristerge qatysyp jatyr. 150 balaǵa arnalǵan lager bir maýsymda 300 balaǵa qyzmet kórsetken jaǵdaılar da anyqtaldy. Balalardyń tamaqtanýyna baılanysty quqyq buzýshylyqtar da tirkeldi. О́nim sapasynyń qaýipsizdigin rastaıtyn qujattar joq. Azyq-túlik saqtaý oryndary talapqa saı kelmeıdi. Al medısına qyzmetkerleri medısınalyq tekserýden ótpegen», dep túsindirdi spıker.
Vıse-mınıstr balalar lagerleriniń 80%-y bıznestiń shaǵyn túrine jatatynyn atap ótti. 2020 jyldan bastap Qazaqstanda shaǵyn bıznesti tekserýge moratorıı engizildi, osyǵan baılanysty eki jyldan astam ýaqyt boıy balalar lagerlerin josparly túrde tekserý júrgizilmegen.
Karıma JUMAǴALI,
Qorqyt ata atyndaǵy Qyzylorda ýnıversıtetiniń stýdenti