Astanada qoǵamdyq demalys oryndary kóbeıe bastady. Osy oraıda Májilis depýtattary jýyrda Baıqońyr aýdanynda boı kótergen «Jýrnalıster alleıasynyń» jaı-kúıimen tanysty. Jasyl jelegi jaıqalǵan alańnyń ereksheligi – mundaǵy qurylys nysandary otandyq óndiristen shyqqan.
Shahar turǵyndar úshin jaıly bolýǵa tıis. Ol úshin qoǵamdyq nysandardyń meılinshe kóp bolǵany durys. Turǵyndardyń bul pikirimen «Amanat» fraksııasynyń músheleri Pavel Kazansev pen Marat Báshimov te kelisedi. Ári qaladaǵy saıabaqtar, alańdar, basqa da nysandar partııanyń saılaýaldy baǵdarlamasyn iske asyrý jónindegi Jol kartasyna kiristirilgen.
– Qoǵamdyq oryndar – qazirgi zamanaýı qalalardy damytýdyń ózegi. Qala turǵyndary demalatyn jáne serýendeıtin oryndar, jaıaý júrginshiler jolaǵy, alańdar, kósheler, skverler, býlvarlar halyqtyń ómir sapasyna tikeleı áser etedi. Olar BUU ındıkatorynda birinshi orynda tur. Sondyqtan qoǵamdyq oryndar men aýlalardy damytý máselesi partııanyń saılaýaldy baǵdarlamasynda qamtylǵan. Tıisinshe, bul jumys depýtattar baqylaýynda bolady. Osyndaı jabdyqtalǵan oryndardy elordanyń ózge de aýdandarynan, tipti elimizdiń barlyq qalasynan kórgimiz keledi. Prezıdent qalany kórkeıtý barysynda oryn alatyn olqylyqtardy synǵa aldy. Sebebi turǵyn úı turǵyzylǵanymen, oǵan jaqyn mańda mektep, balabaqsha, aýrýhana, tipti demalýǵa arnalǵan aýla salynbaıdy. Kúni keshe ǵana Baıqońyr kesh damyp kele jatqan aýdandardyń biri edi. Búginde aýdan gúldenip, ata-analar balalarymen birge serýendeı alatyn keremet alańdar paıda boldy. Damyǵan áleýmettik ınfraqurylymsyz baıandy bolashaq bolmaıdy, – dedi Marat Báshimov.
Depýtattar 13-ten astam shaǵyn arhıtektýralyq nysan ornalasqan «Jýrnalıster alleıasyn» baqylady. Astananyń 25 jyldyǵy qarsańynda ashylǵan alańda shaǵyn sáýlet formalary, jaryq baǵanalary, oryndyqtar qoıylyp, demalys aımaqtary qurylǵan. Buǵan qosa 230-dan astam jasyl jelek otyrǵyzylypty.
– Tez kórkeıip kele jatqan qalada, ádette, demalys ınfraqurylymy sál kesheýildep damıdy. Dál qazir biz «Jýrnalıster alleıasynda» turyp, bul jerdiń qalaı ózgergenine kýá bolyp otyrmyz. Onyń ústine, munda jastar turatyn birneshe turǵyn úı kesheni boı kóterdi. Byltyr Baıqońyr aýdanynda nebári 2 qoǵamdyq oryn bolsa, bıyl onyń sany 9-ǵa jetkizilmek. Sondaı-aq qurylys barysynda qandaı materıaldar paıdalanylatynyna nazar aýdarý qajet, – dedi Pavel Kazansev.
Sondaı-aq fraksııa músheleri Kenesary kóshesindegi «7 Kontınent» turǵyn úı kesheniniń aýlasyn da tekserdi. Munda turǵyndar úshin eki sport alańy, átkenshekteri bar demalys aımaǵy, balalar oıyn alańdary men arnaıy júgirý joly ornatylǵan. Jalpy, halyq ıgiligi úshin Baıqońyr aýdanynda taǵy 23 qoǵamdyq oryndy paıdalanýǵa berý josparda bar.
«Amanat» partııasynyń Astana qalalyq saılaýaldy baǵdarlamasy aıasynda aldaǵy bes jylda 120 sport alańyn ornatyp, 796 aýlany abattandyrý josparlanyp otyr. Bul 750 myń turǵynǵa qolaıly orta qalyptastyrýǵa múmkindik beredi. Sondaı-aq qatty turmystyq qaldyqtarǵa arnalǵan 2,4 myńnan astam konteıner qoıylyp, 175 konteıner alańy jabdyqtalady. Al «Temirjol», «Kóktal», «О́ndiris», «Ońtústik-Shyǵys» jáne ózge de turǵyn jaılarda aýla aýmaǵy abattandyrylmaqshy.