Sport kúnine oraı, Qazaqstan OKZ-da elimizdiń sportshylaryn, sala ardagerleri men qyzmetkerlerin Qurmet gramotalarymen jáne vedomstvolyq nagradalarymen marapattaý rásimi ótti, dep jazady Egemen.kz.
Saltanatty rásim bastalar aldynda Mádenıet jáne sport mınıstri Ashat Oralov quttyqtaý sóz sóılep, otandyq sporttyń damýyna qosqan úlesi jáne jarqyn jeńisteri úshin sala ókilderine alǵys aıtty. Saltanatty rásim barysynda Ashat Oralov qazaqstandyq sport ardagerlerine «Eńbek ardageri» medalin tabys etti, olardyń arasynda bokstan QR eńbek sińirgen jattyqtyrýshysy Marat Eleýsinov, bokstan QR eńbek sińirgen jattyqtyrýshysy Janat Manashev, 1972 jylǵy Olımpıadanyń kúmis júldegeri Vıktor Aboımov jáne basqa da tanymal sportshylar men jattyqtyrýshylar bar. Sonymen qatar mınıstr sportshylardy, jattyqtyrýshylar men sport uıymdarynyń qyzmetkerlerin «Cport salasynyń qurmetti qyzmetkeri» jáne «Dene shynyqtyrý men sportqa sińirgen eńbegi úshin» tósbelgilerimen, sondaı-aq Mádenıet jáne sport mınıstrliginiń Qurmet gramotasy jáne Alǵys hattarymen marapattady. Aıtýly kún qarsańynda barlyǵy 250 adam qurmetke ıe boldy.
Mádenıet jáne sport mınıstrliginiń málimetine súıensek, búginde árbir úshinshi qazaqstandyq nemese 7 mln 587 myń adam sportpen aınalysady. Bul jalpy halyq sanynyń 38,5%-y. Onyń ishinde 800-den astam dene shynyqtyrý klýbtarynda 258 myńnan astam balalar men jasóspirimder sportpen shuǵyldanady. Sońǵy 3 jylda sportpen jáne dene shynyqtyrýmen aınalysatyn erekshe qajettilikteri bar adamdardyń sany 25,3%-ǵa ósip, 51 325 adamǵa jetken. Al, 584 myńǵa jýyq adam ulttyq sport túrlerimen júıeli túrde aınalysady eken. Respýblıka boıynsha barlyǵy 43 myńnan astam sporttyq ǵımarat bolsa, onyń 23 myńnan astamy – aýyldyq jerlerdiń úlesinde. Bıylǵy jyly 113 jańa sporttyq nysan salý, 20 sporttyq nysandy rekonstrýksııalaý, 6 jumys istep turǵan sport obektilerin jete jaraqtandyrý boıynsha jumys bastaldy. Elimizde jyl saıyn 1,2 mln adamdy, onyń ishinde aýyldyq jerlerde 500 myń adamdy qamtıtyn, ártúrli deńgeıdegi 25 myńnan asa sporttyq-buqaralyq is-shara turaqty túrde ótkizilip otyr. Ásirese, sońǵy jyldary júgirý, marafondar, velosherýler men velomarafondar, sporttyq festıvaldar, otbasylyq jarystar, jappaı syrǵanaýlar tanymal bola bastady. Aıta keteıik, sport kúnine oraı elimizdiń barlyq óńirinde júzden astam is-shara, onyń ishinde eresekter, balalar, jasóspirimder men erekshe qajettilikteri bar adamdar arasyndaǵy sporttyq jarystar, sporttyq qoıylymdar, sala ardagerleri men qyzmetkerlerin marapattaý rásimderi, marafondar, kóńildi starttar jáne taǵy basqa buqaralyq is-sharalar ótedi. Bul jarystarda kez - kelgen adam saıysqa qatysyp, óziniń sportyq qabiletin synap kóre alady.