Ispanııanyń Valdepenıas qalasynda fýtzaldan «Mucho Mas» dep atalatyn halyqaralyq týrnır óz máresine jetti.
Jartylaı fınalda Almatynyń «Qaıraty» jergilikti «Barselonadan» 1:6 esebimen oısyraı utyldy. Bizdiń komandamyzdyń oıynshylary arasyndaǵy jalǵyz goldyń avtory – Dener Rodrıgo. «Barselonanyń» sapynda Katela dýbldiń avtory atansa, Serhıo Gonsales, Dıego jáne Adolfo bir-bir retten nysanany dál kózdedi. Taǵy bir dopty almatylyqtar óz qaqpasyna soǵyp aldy. Ekinshi jartylaı fınalda «Valdepenıas» «Palmany» 4:3 esebimen utty. Qola medal úshin básekede «Qaırat» «Palmamen» kezdesip, olardyń qaqpasyna jaýapsyz jeti gol soqty – 7:0. Brazılııalyq legıoner Dener Rodrıgo het-trık jasasa, Kaıo Rýıs, Edson, Allıson de Lıma jáne Dýglas nysanany dál kózdedi. Al bas júlde «Barselonaǵa» buıyrdy. Fınalda olar «Valdepenıasty» 2:1 esebimen jeńdi.
«Qaırat» 23-26 tamyz kúnderi Portýgalııada ótetin «Masters Cup» dodasynda da baq synaýdy kózdep otyr. Bul jarysqa almatylyqtardan bólek, jergilikti «Sportıng», «Benfıka» jáne «Braga» qatysady.