Partııalyq «Tomiris» baǵdarlamasy aıasynda «Áıelderdiń kóshbasshylyǵy» taqyrybyndaǵy trenıng-vorkshoptyń ashylý saltanaty ótti. «Amanat» partııasynyń Saıası menedjment akademııasy bul jobany Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııamen, Konrad Adenaýer qorymen birge uıymdastyrdy.
Májilistegi «Amanat» fraksııasynyń depýtaty, is-shara moderatory Juldyz Súleımenovanyń aıtýynsha, bıyl jobaǵa qatysýǵa 300-den astam adam ótinim bildirip, onyń 75-i irikteý kezeńine joldama aldy. Nátıjesinde, 42 qatysýshy irikteýden irkilmeı ótti. Aıta keteıik, byltyr jobaǵa qatysqan 37 qyz-kelinshektiń 12-si keıin oblystyq, qalalyq jáne aýdandyq máslıhattardyń depýtaty bolyp saılandy.
«Memleket basshysy elimizdiń jańasha kelbetiniń biri teń ári ádiletti qoǵam qurý ekenin aıtqany belgili. Byltyr el tarıhyndaǵy asa mańyzdy saıası oqıǵalardyń biri – jalpyulttyq referendým ótkizilip, Ata Zańymyzǵa ózgertýler men tolyqtyrýlar engizildi. 2020 jyldan beri jańa saılanatyn Parlament Májilisi men barlyq deńgeıdegi máslıhat depýtattarynyń 30 paıyzyn áıelder men jastar quraýǵa tıis degen mindet qoıyldy. Bıliktegi áıelder úlesi artyp, isker áıelderge memlekettik túrli qoldaý kórsetilip jatyr. Munyń barlyǵy kóshbasshy áıelderdiń qoǵamdaǵy rólin arttyrýdyń alǵysharty dep bilemin», dedi partııanyń atqarýshy hatshysy Dáýlet Káribek.
Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen Ortalyq Azııa elderimen salystyrǵanda, Qazaqstanda áıelder kóshbasshylyǵy aıtarlyqtaı damyp kele jatqanyn jetkizdi.
«1991-2010 jyldar aralyǵynda elimizdiń ońtústik óńirindegi aýdandyq máslıhattarda birde-bir áıel depýtat bolǵan joq. Keıin, 2010-2022 jyldary ulttyq komıssııa barlyq deńgeıdegi máslıhattarda áıel depýtattardyń bolýyn baqylaýǵa aldy. Máselen, 2010 jyly máslıhattardaǵy áıel depýtattardyń úlesi nebári 10 paıyzdy qurasa, 2022 jyly bul kórsetkish 30 paıyzǵa jetti. BUU-nyń 2021-2022 jyldardaǵy deregine sáıkes erler men áıelder arasyndaǵy damý ındeksi boıynsha resýrsy óte joǵary elderdiń qatarynda turmyz. Bul – saıası kóshbasshylyqqa qajet eń basty resýrs. Bilimdi, aqyldy qyz-kelinshekter – el tiregi», dedi ol.
Jıyn basynda Konstıtýsııalyq sot tóraǵasy Elvıra Ázimova, Densaýlyq saqtaý mınıstri Ajar Ǵınııat, Májilis depýtaty Aıgúl Quspan, Jambyl oblysy Taraz qalalyq máslıhatynyń depýtaty, «Tomiris» jobasynyń byltyrǵy qatysýshylary Áıgerim Dáýletbaeva men Oksana Erjanova sóz alyp, partııa tarapynan atqarylyp jatqan jobanyń mańyzy jaıynda oı-pikirlerimen bólisti.