Prezıdent AQSh Senaty Ulttyq qaýipsizdik jáne Úkimet isteri jónindegi komıtetiniń tóraǵasy Gerı Pıtersti qabyldady. Memleket basshysy senatorǵa iltıpat bildire otyryp, onyń sapary ekijaqty yntymaqtastyq máseleleri boıynsha jan-jaqty pikir almasýǵa jaqsy múmkindik ekenin atap ótti, dep habarlaıdy Egemen.kz Aqordanyń baspasóz qyzmetine silteme jasap.
– Amerıka Qurama Shtattary jahandyq qaýipsizdikti nyǵaıtý, ıadrolyq qarýdy taratpaý, ekonomıkalyq turaqtylyqty qamtamasyz etý jáne demokratııalyq qundylyqtardy ilgeriletý isinde árdaıym bizdiń elimizdiń strategııalyq seriktesi sanalǵan. Biz kóp nársege qol jetkizdik dep oılaımyn. Áıtse de eki eldiń múddesine saı keletin salalardaǵy ózara yntymaqtastyǵymyzdy nyǵaıtý úshin alǵa qaraı jyljýymyz kerek, – dedi Prezıdent.
Áńgimelesý barysynda Qasym-Jomart Toqaev bıyl qyrkúıek aıynda BUU Bas Assambleıasy alańynda «S5+1» formatynda ótetin AQSh pen Ortalyq Azııa memleketteri basshylarynyń alǵashqy sammıtine shaqyrǵany úshin Prezıdent Djo Baıdenge rızashylyǵyn bildirdi.
О́z kezeginde senator Gerı Pıters Amerıka Qurama Shtattary men Qazaqstan arasyndaǵy qarym-qatynasqa qatysty negizgi máselelerdi talqylaý múmkindigi úshin Qasym-Jomart Toqaevqa alǵys aıtty.
– Ortalyq Azııa – álemniń mańyzdy bóligi, al Qazaqstan – Ortalyq Azııa óńirindegi negizgi memleketterdiń biri. Sondyqtan biz aldaǵy ýaqytta yntymaqtasa jumys isteýge múmkindigimiz bar ekenine kóz jetkizgimiz keledi. Bul pikirimdi Prezıdent Baıden de quptaıdy dep oılaımyn. Ol Sizben taıaý ýaqytta Nıý-Iorkte kezdesýge nıetti. Bul kezdesý bizdiń qarym-qatynasymyzdy nyǵaıtýǵa oń yqpal etedi dep oılaımyn, – dedi AQSh senatory.
Kezdesý barysynda sondaı-aq halyqaralyq jáne óńirlik kún tártibindegi ózekti máseleler talqylandy.