Ulttyq sport qaýymdastyǵynyń bir jyldyq jumys nátıjesi, ulttyq sporttaǵy ózekti máseleler men aldaǵy josparlar talqylanǵan kezdesýde qaýymdastyq prezıdenti Islambek Saljanov 1 qyrkúıekte «ALAMAN» medıa baıqaýy bastalatynyn aıtty, dep jazady Egemen.kz.
I.Saljanov tuńǵysh ret ótkiziletin baıqaýdyń maqsatyn atap ótti: ulttyq sport túrleriniń nasıhatyn kúsheıtý úshin osy saladaǵy jýrnalıster, BAQ ókilderi jáne avtorlardy kásibı turǵydan baǵalap, eń úzdikterin anyqtaý.
Baıqaý 1 qyrkúıekten 2024 jyldyń 1 naýryz aralyǵynda 6 aı boıy ótkizilip, oǵan otandyq jýrnalıster, avtorlar jáne sheteldik BAQ ókilderi de qatysa alady.
Baıqaýda «Úzdik baǵdarlama» (televızııa, radıo), «Úzdik analıtıkalyq materıal» (dástúrli baspasóz: gazet, jýrnal), «Úzdik tanymdyq materıal» (ınternet, BAQ), «Úzdik suhbat» (YouTube arna), «Úzdik fotosýret» (BAQ, áleýmettik jeli), «Sheteldik BAQ-ta jarııalanǵan úzdik materıal» (qazaqtyń ulttyq sporty týraly), «Áleýmettik jelidegi úzdik materıal» (blogıng, mobılografııa) sııaqty nomınasııalar bar.
Baıqaýdyń jeńimpazdary 2024 jyldyń naýryz aıynda marapattalady.
Úsh úzdik avtorǵa 1 000 000 teńge (1-oryn), 700 000 teńge (2-oryn), 500 000 teńge (3-oryn) kóleminde aqshalaı syılyq beriledi.
Aıta ketsek, baıqaý 2024 jyly Qazaqstanda ótkiziletin V Dúnıejúzilik Kóshpendiler oıyndary qarsańynda ótkiziledi.