Keńes Odaǵynyń eki márte batyry Talǵat Bıgeldınov atyndaǵy Áýe qorǵanys kúshteriniń Áskerı ınstıtýtyna bıyl 200-den astam kýrsant oqýǵa túsken. Onyń 22-si – qyzdar. Olar «Áskerı medısına» mamandyǵy boıynsha bilim alady, dep habarlaıdy Egemen.kz Aqtóbe oblysy ákimdiginiń baspasóz qyzmetine silteme jasap.
Konstıtýsııa kúni qarsańynda ınstıtýt bazasynda áskerı ant qabyldaý rásimi ótti. Saltanatty sharaǵa oblys ákimi Eraly Toǵjanov qatysty.
«Búgin sizder Qazaqstan halqyna jáne onyń zańdy túrde saılanǵan Prezıdentine adal qyzmet etýge áskerı ant qabyldaǵaly tursyzdar. Áskerı ant qabyldaý kúnimen shyn júrekten quttyqtaımyn! Oqý baǵdarlamasyn tabysty ıgerip, Qazaqstan Respýblıkasy Qarýly Kúshteriniń úlgili áskerı qyzmetshisi bolýlaryńyzǵa shyn tilektestigimdi bildiremin. Batyr babamyz Baýyrjan Momyshulynyń «Tártipsiz el bolmaıdy, tártipke bas ıgen el - qul bolmaıdy» degen qanatty sózin esten shyǵarmaı, Otanymyzdyń ıgiligi men damýy úshin aıanbaı qyzmet etýge shaqyramyn», degen óńir basshysy jas Otan qorǵaýshylarǵa sáttilik tiledi.
Ushqyshtar ınstıtýty – Ortalyq Azııadaǵy ushý jáne ınjenerlik-tehnıkalyq quramdy birlesip oqytýdy júzege asyratyn jalǵyz áskerı oqý orny. Táýelsizdik alǵaly áskerı ınstıtýttan Qarýly kúshter qataryna 2700-den astam ofıser qosyldy.
Qazirgi ýaqytta oqý orny 13 biliktilik boıynsha joǵary áskerı-kásiptik bilim berý baǵdarlamasymen ofıserlik kadrlardy oqý prosesine zamanaýı avıasııalyq trenajerdi engize otyryp, ázirleýde. 2021 jyldan bastap ınstıtýt ushqyshsyz ushý apparattaryn paıdalaný boıynsha mamandar daıarlaýdy bastady.